ՀՀ ոստիկանությունում հյուրընկալվել էր ՀՀ-ում Ամերիկայի Միացյալ Նահանգների դեսպանը

Նոյեմբերի 14-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն ընդունեց Հայաստանի Հանրապետությունում Ամերիկայի Միացյալ Նահանգների դեսպան Ջոն Հեֆեռնին:

Ողջունելով հյուրին՝ Վլադիմիր Գասպարյանն իր գոհունակությունը հայտնեց Հայաստանի ոստիկանության և ԱՄՆ դեսպանության համագործակցության առթիվ, որն արդեն էական արդյունքներ է տվել ոստիկանության կրթական հաստատությունների արդիականացման ու տեխնիկական հագեցման, համայնքային ոստիկանության կազմակերպման, կադրերի պատրաստման ու վերապատրաստման, մի շարք այլ ոլորտներում:

Ոստիկանության պետը, մասնավորապես անդրադարձավ հասարակական կարգի պահպանման նոր ստորաբաժանման արդյունավետ աշխատանքին՝ նշելով, որ մոտ ժամանակներս նույնպիսի սպայական գումարտակներ են կազմավորվելու Գյումրիում ու Վանաձորում, իսկ հետագայում ունենալու ենք մի ամբողջ գունդ:

Ջոն Հեֆեռնին հետաքրքրում էին նաև Ճանապարհային ոստիկանությունում ընթացող բարեփոխումները:

Վլադիմիր Գասպարյանը նշեց, որ բարեփոխումներին զուգահեռ իրականացվում է մայրաքաղաքում, ապա և հանրապետության ճանապարհներին տեսախցիկների տեղադրման գործընթացը, ինչից հետո, որպես հերթական փուլ, Ճանապարհային ոստիկանությունը կվերափոխվի Պարեկային ծառայության:

ԱՄՆ դեսպանն անդրադարձավ առաջիկա նախագահական ընտրությունների ընթացքում ոստիկանության ծառայության կազմակերպման խնդրին:

Վլադիմիր Գասպարյանը նշեց, որ արդեն իսկ լուրջ փորձառություն է ձեռք բերվել խորհրդարանական և տեղական ինքնակառավարման մարմինների ընտրությունների ժամանակ: Մշակվել և արդեն կիրառվում են ուղեցույցներ, որոնք ոստիկաններին օգնել են առավել արդյունավետ իրականացնել իրենց գործառույթները, դիտարկվել են թերություններն ու դրանց վերացման միջոցները, շարունակվում է ընտրացուցակների կատարելագործման աշխատանքը, և ոստիկանությունը լիարժեք կկատարի օրենքով իրեն վերապահված գործառույթները: 

Հանդիպման ընթացքում քննարկվեցին փոխադարձ հետաքրքրություն ներկայացնող այլ հարցեր ևս: