ՀՀ ոստիկանության թեժ գիծ
  • Ընդհանուր հարցերով
    (+374) 10 54-69-14
    (+374) 10 54-69-12
    Աշխ. ժամեր՝ 9-ից 18-ը: Ընդմիջում՝ 13-ից 14-ը:
    Հանգստյան օրեր՝ շաբաթ, կիրակի:
  • Ճանապարհային ոստիկանություն
    1-77, 060-83-10-22
    Ճանապարհային ոստիկանության հաշվառման և քննական ստորաբաժանումների գործառույթներին (վարորդական իրավունքի վկայական ստանալ, փոխանակել, տրանսպորտային միջոցներ հաշվառել, անվանափոխել և այլն) վերաբերող հարցերով
    060-83-83-02
  • Թրաֆիքինգի և անօրինական միգրացիայի հարցերով
    0800-505-50
  • Անձնագրային և վիզաների վարչություն
    (+374) 10 37-02-64
Ոստիկանության ստորաբաժանումներում գործող Թեժ գծերի պատասխանատուների տվյալները
  • Ընդհանուր հարցերով
    (+374) 10 54-69-14
    (+374) 10 54-69-12
    (պատասխանատու՝ հեռ. 011-58-76-03)
  • Ճանապարհային ոստիկանություն
    Բջջ. 1-77
    (պատասխանատու՝ հեռ. 060-83-10-23)
  • Անձնագրային և վիզաների վարչություն
    (+374) 10 37-02-64
    (պատասխանատու՝ հեռ. 011-37-06-00)
  • Թրաֆիքինգի և անօրինական միգրացիայի հարցերով
    0800-505-50
    հերթապահ մաս
    (պատասխանատու՝ հեռ. 011- 56-39-63)

2021 թվական, 1-ին կիսամյակ

2021 թ. 1-ին կիսամյակի  ընթացքում ՀՀ ոստիկանության միջազգային գործունեության և ուժի մեջ մտած միջազգային պայմանագրերի կատարման ընթացքի մասին

 

2021 թ. 1-ին կիսամյակի ընթացքում ՀՀ ոստիկանությունը շարունակել է երկկողմ և բազմակողմ սերտ համագործակցությունը օտարերկրյա պետությունների ներքին գործերի նախարարությունների (ոստիկանությունների) և միջազգային կազմակերպությունների հետ:

Միևնույն ժամանակ, բազմաթիվ միջոցառումներ, կապված Կորոնավիրուսի (COVID-19) համավարակի հետ, հետաձգվել են անորոշ ժամանակով կամ անցկացվել են հեռավար:

 

Հանդիպումներ ՀՀ ոստիկանության պետի և Հայաստանի Հանրապետությունում հավատարմագրված դեսպանների, միջազգային և այլ կազմակերպությունների ղեկավարների հետ

 

Հունվարի 29-ին ոստիկանության պետն ընդունել է Հայաստանի Հանրապետությունում Բելառուսի Հանրապետության արտակարգ և լիազոր դեսպան Ալեքսանդր Կոնյուկին։ Բարձր գնահատելով Հայաստանի ոստիկանության և Բելառուսի ներքին գործերի նախարարության համագործակցությունը՝ ոստիկանության պետը երկու երկրների իրավապահ կառույցների փոխգործակցությունը շարունակելու և ընդլայնելու պատրաստակամություն է հայտնել։

Ալեքսանդր Կոնյուկը կարևորել է ինչպես երկկողմ, այնպես էլ միջազգային կազմակերպությունների շրջանակներում երկու երկրների իրավապահ կառույցների միջև առկա կապը։ Հանդիպմանը քննարկվել են փոխադարձ հետաքրքրություն ներկայացնող տարաբնույթ հարցեր։

Փետրվարի 5-ին ոստիկանության պետն ընդունել է Հայաստանի Հանրապետությունում Նիդեռլանդների Թագավորության արտակարգ և լիազոր դեսպան Նիկո Սխերմերսին։ Ոստիկանության պետը փոխգործակցությունն առավել բարձր մակարդակի հասցնելու պատրաստակամություն է հայտնել։

Հանդիպման ընթացքում ոստիկանության պետի տեղակալը ներկայացրել է ոստիկանությունում ընթացող բարեփոխումները՝ խոսելով ներքին գործերի նախարարության և պարեկային ծառայության ձևավորման մասին։

Նիկո Սխերմերսը երկու երկրների իրավապահ կառույցների միջև համագործակցության խորացման աջակցելու պատրաստակամություն է հայտնել։ Հանդիպմանը քննարկվել են նաև Հայաստանի ոստիկանության և Եվրոպոլի միջև համագործակցության, ինչպես և փոխադարձ հետաքրքրություն ներկայացնող այլ հարցեր։

Փետրվարի 12-ին և ապրիլի 12-ին ՀՀ ոստիկանության պետն ընդունել է «Հարավկովկասյան երկաթգիծ» ՓԲԸ-ի գլխավոր տնօրենի գլխավորած պատվիրակությանը: Հանդիպման ընթացքում քննարկվել են 2020թ․ և 2021թ․ Հարավկովկասյան երկաթուղուն պատկանող տարածքներում կատարված հանցագործությունների մասին հարցեր։

Փետրվարի 19-ին ՀՀ ոստիկանության պետն ընդունել է ՀՀ-ում Վրաստանի արտակարգ և լիազոր դեսպան Գիորգի Սագանելիձեի գլխավորած պատվիրակությանը։      

Ոստիկանության պետը կարևորել է երկու երկրների միջև բարեկամական սերտ հարաբերություններն ու հատկապես Հայաստանի Հանրապետության ոստիկանության և Վրաստանի ներքին գործերի նախարարության միջև ակտիվ փոխգործակցությունը։

Գիորգի Սագանելիձեն կարևորել է ինչպես երկկողմ, այնպես էլ միջազգային կազմակերպությունների շրջանակներում երկու իրավապահ կառույցների միջև առկա կապը։

Մայիսի 14-ին ոստիկանության պետն ընդունել է Հայաստանում Ճապոնիայի արտակարգ և լիազոր դեսպան Ֆուկուսիմա Մասանորիին։ Ոստիկանության պետը շնորհավորել է դեսպանին նշանակման կապակցությամբ և արգասաբեր աշխատանք մաղթել։ Ոստիկանության պետն ընդգծել է, որ սա Հայաստանում Ճապոնիայի արտակարգ և լիազոր դեսպանի առաջին այցն է ոստիկանություն, ինչը կնպաստի երկու կողմերի համագործակցության զարգացմանը։

Ֆուկուսիմա Մասանորին կարևորել է քաղաքացիների անվտանգության ապահովման գործում մասնավորապես ոստիկանության աշխատանքը։ Հանդիպմանը ոստիկանության պետի տեղակալը ներկայացրել է Հայաստանի ոստիկանությունում ընթացող բարեփոխումների մանրամասներ։

Հանդիպմանը քննարկվել են համագործակցության ընդլայնման հնարավորություններն ու փոխադարձ հետաքրքրություն ներկայացնող այլ հարցեր։

Մայիսի 27-ին ոստիկանության պետն ընդունել է Հայաստանում Հնդկաստանի արտակարգ և լիազոր դեսպան Կիշան Դան Դևալին: Ոստիկանության պետը, բարձր գնահատելով Հնդկաստանի դեսպանության և ՀՀ ոստիկանության միջև ձևավորված արդյունավետ համագործակցությունը, հայտնել է, որ ոստիկանության առաջնային գործառույթներից է ապահովել ինչպես Հայաստանի, այնպես էլ այլ պետությունների՝ Հայաստանում գտնվող քաղաքացիների անվտանգությունը։

Կիշան Դան Դևալը խոսել է առկա համագործակցության և դրա զարգացման հեռանկարի մասին։ Արտակարգ և լիազոր դեսպանը շնորհակալություն է հայտնել Հայաստանի ոստիկանությանը՝ հնդիկ քաղաքական գործիչ և հոգևոր առաջնորդ Մահաթմա Գանդիի արձանի հետ կատարված դեպքին արագ արձագանքելու և կատարողին հայտնաբերելու համար։ Հանդիպմանը քննարկվել են փոխադարձ հետաքրքրություն ներկայացնող այլ հարցեր։

 

 

 

Երկկողմ համագործակցություն

Ռուսաստանի Դաշնություն

 

 

Շարունակվել է սերտ համագործակցությունը ՌԴ ներքին գործերի նախարարության հետ` 2008թ. հունիսի 20-ին Երևանում ստորագրված «ՀՀ ոստիկանության և ՌԴ ՆԳՆ միջև համագործակցության մասին» համաձայնագրի շրջանակներում:

Փետրվարի 15-ից մարտի 12-ը ՌԴ ՆԳՆ կողմից կազմակերպվել և անցկացվել է «Ոստիկանության տեղամասային տեսուչների գործունեության կազմակերպումը» թեմայով որակավորման բարձրացման առցանց դասընթաց, որին մասնակցել է ՀՀ ոստիկանության 1 ծառայող։

Մայիսի 12-ից 16-ը ՌԴ Մոսկվա քաղաքում կայացել է ծառայողական պարտականությունները կատարելիս զոհված ոստիկանների և զինծառայողների հիշատակին նվիրված ձյուդոյի վետերանների 15-րդ մրցաշարը, որին մասնակցել է ոստիկանության 1 ծառայող։

Մայիսի 27-ին անցկացվել է «ՀՀ կառավարության և ՌԴ կառավարության միջև ՀՀ տարածքում աշխատող ՌԴ քաղաքացիների և ՌԴ տարածքում աշխատող ՀՀ քաղաքացիների աշխատանքային գործունեության և սոցիալական պաշտպանվածության մասին» համաձայնագրի իրագործման նպատակով ստեղծված հայ-ռուսական համատեղ աշխատանքային խմբի 8-րդ նիստը՝ առցանց ձևաչափով, որին մասնակցել է ոստիկանության 1 ծառայող։

Հաշվետու ժամանակահատվածում Համաձայնագրի շրջանակներում զգալի աշխատանքներ են կատարվել նաև բազմաթիվ օպերատիվ-հետախուզական միջոցառումներ իրականացնելիս։  

 

Ամերիկայի Միացյալ Նահանգներ

 

 

2021թ. առաջին կիսամյակի ընթացքում ՀՀ ոստիկանությունը սերտ համագործակցություն է իրականացրել ՀՀ-ում ԱՄՆ դեսպանության հետ, մասնավորապես՝ Թմրամիջոցների դեմ պայքարի և իրավապահ համագործակցության ծրագրի (INL), Տարածաշրջանային անվտանգության ծառայության հետաքննությունների ծրագրի (ARSO-I),  Վրաստանում ԱՄՆ դեսպանության իրավական կցորդի միջոցով՝ Հետաքննությունների Դաշնային Բյուրոյի հետ, փոխադարձ հետաքրքրություն ներկայացնող հետևյալ ուղղություններով.

  • Պայքար թմրամիջոցների ապօրինի շրջանառության դեմ,
  • Թրաֆիքինգ,
  • Պայքար ընտանեկան բռնության դեմ, անչափահասների հետ տարվող աշխատանքներ,
  • Պարեկային ծառայություն,
  • Վերապատրաստումներ ոստիկանության ծառայողների համար և այլն:

 

2021թ. 1-ին կիսամյակի ընթացքում  մի շարք հանդիպումներ և քննարկումներ են կազմակերպվել ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ /INL) ծրագրի տնօրեն Մայքլ Շուլմանի և ծրագրի իրավապահ հարցերով ավագ խորհրդատու Ադի Հոլովեյի հետ:

ՀՀ վարչապետի 04․12․2019թ․ թիվ 02//51769-2019 հանձնարարականի համաձայն՝ ՀՀ ոստիկանության ինստիտուցիոնալ բարեփոխումների և տեխնիկական վերազինման հայեցակարգի մշակման ուղղությամբ համապատասխան աշխատանքներ են տարվել ՀՀ արդարադատության նախարարության, ՀՀ ոստիկանության և ՀՀ-ում ԱՄՆ դեսպանության միջև` միջազգային փորձագետների ներգրավմամբ:

Նոր Պարեկային ծառայության ստեղծման շրջանակներում ուսուցումն անցկացնող դասընթացավարների ընտրության և վերապատրաստման աշխատանքներում ընդգրկվել են նաև Թմրամիջոցների դեմ պայքարի և իրավապահ համագործակցության ծրագրի (INL) ներկայացուցիչները:

Հունվարի 25-ից փետրվարի 4-ը ՀՀ-ում ԱՄՆ դեսպանության աջակցությամբ կայացել է Հետաքննությունների դաշնային բյուրոյի գործակալներ Մայքլ Ալեսի և Բրոք Բահեի այցը Երևան: Այցի նպատակն էր իրականացնել ՀՀ ոստիկանության քրեական ոստիկանության գլխավոր վարչության Հատուկ նշանակության վարչության կարիքների գնահատումը: Այցի ժամանակ ամերիկյան կողմի խնդրանքով կազմակերպել են մի շարք հանդիպումներ, որոնց ընթացքում վերջիններս հնարավորություն են ունեցել ծանոթանալու Հատուկ նշանակության վարչության կառուցվածքին, գործառույթներին, սպառազինությանը, ուսումնական և մարտական, ինչպես նաև  վերապատրաստման ծրագրերին, այցելել Ոստիկանության հրաձգարան: Այցի արդյունքներով նախատեսվում է կազմել կարիքների գնահատման զեկույց, որը կներկայացվի ՀՀ ոստիկանությանը:

Փետրվարի 17-ին ՀՀ ոստիկանության պետի տեղակալն ընդունել է ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության ծրագրի տնօրեն Մայքլ Շուլմանի գլխավորած պատվիրակությանը: Ոստիկանության պետի տեղակալը բարձր է գնահատել ամերիկյան գործընկերների կողմից ոստիկանությունում իրականացվող բարեփոխումներին ուղղված մինչ այժմ կատարված աշխատանքները։

Մայքլ Շուլմանն ընդգծել է, որ ամերիկյան կողմը պատրաստակամ է շարունակել համագործակցությունն ու աջակցությունը ուղղված Հայաստանի ոստիկանության արդիականացման ու ծառայությունների որակի բարձրացման աշխատանքներին:

Հանդիպման ընթացքում քննարկվել են ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության ծրագրի հետ 2021 թվականի ընթացքում նախատեսվող ծրագրերը, ինչպես նաև փոխադարձ հետաքրքրություն ներկայացնող մի շարք այլ հարցեր:

Հունիսի 4-ին ՀՀ-ում ԱՄՆ դեսպանության անվտանգության պետ Քրեգ Գոլդսթինը հանդիպում է ունեցել ՀՀ ոստիկանության Երևան քաղաքի վարչության պետի հետ։

Հանդիպման ընթացքում քննարկվել են Երևան քաղաքի հանցավորության ներկայիս մակարդակը, վիճակագրությունն ու կանխատեսվող ցուցանիշները և հանցավորության դեմ պայքարին վերաբերող հարցեր։ Քննարկվել են նաև երկուստեք հետաքրքրություն ներկայացնող հարցեր, ինչպես նաև ձեռք են բերվել համագործակցության վերաբերյալ պայմանավորվածություններ։

Հունիսի 9-ին ՀՀ ոստիկանության պետի տեղակալն ընդունել է ԱՄՆ խաղաղության կորպուսի հայաստանյան գրասենյակի ղեկավար Ջոան Ֆեյրլիի գլխավորած պատվիրակությանը։ Ոստիկանության պետի տեղակալը բարձր է գնահատել ամերիկյան գործընկերների կողմից մինչ այժմ կատարված աշխատանքները, որոնք ուղղված են ոստիկանությունում իրականացվող բարեփոխումներին։ Հանդիպման ընթացքում քննարկվել են ԱՄՆ խաղաղության կորպուսի կամավորների անվտանգության, ոստիկանության և դրա տարածքային ստորաբաժանումների հետ հետագա համագործակցությանն առնչվող հարցեր։ 

Հունիսի 9-ին ՀՀ-ում ԱՄՆ դեսպանության կողմից անցկացվել է կիբերանվտանգության հարցերով առցանց համաժողով, որին մասնակցել է ոստիկանության 2 ծառայող։

Հունիսի 7-ից 18-ը Միջազգային քրեական hետախուզության վերաբերյալ ուսումնական օժանդակման ծրագրի (ICTAP) առաքելությամբ պարեկային ծառայության ղեկավար կազմի համար անցկացվել է վերապատրաստման դասընթաց, որին մասնակցել են ոստիկանության 34 ծառայողներ։

Հունիսի 14-ից 18-ը ՀՀ ոստիկանության կրթահամալիրում ՀՀ ոստիկանության, ՀՀ պետական եկամուտների կոմիտեի և ՀՀ ազգային անվտանգության 23 ծառայողների համար անցկացվել է ԱՄՆ արդարադատության դեպարտամենտի թմրամիջոցների դեմ պայքարի վարչության և ՀՀ-ում ԱՄՆ դեսպանության կողմից կազմակերպված անձնակազմի վերականգնման թեմայով վերապատրաստման դասընթացը: Դասընթացը վարում էին ԱՄՆ արդարադատության դեպարտամենտի թմրամիջոցների դեմ պայքարի վարչության  փորձագետներ: Վերապատրաստումը կազմված էր ինչպես տեսական, այնպես էլ գործնական պարապմունքներից:

Հաշվետու ժամանակահատվածում կայացել են մի շարք հանդիպումներ և միջոցառումներ ևս:

 

Ֆրանսիայի Հանրապետություն


 

Շարունակվել է համագործակցությունը ՀՀ ոստիկանության և Ֆրանսիայի Հանրապետության ներքին գործերի նախարարության միջև ստորագրված «Ներքին անվտանգության ոլորտում համագործակցության մասին» վարչական համաձայնագրի, ինչպես նաև տարեկան գործողությունների ծրագրի շրջանակներում:

Հունվարի 18-ին ՀՀ ոստիկանության շտաբի պետի տեղակալը հանդիպել է ՀՀ-ում Ֆրանսիայի դեսպանության ներքին անվտանգության հարցերով նորանշանակ կցորդ պարոն Էրվե Ժամեի հետ (նստավայրը՝ Վրաստան):

Շնորհավորելով պարոն Ժամեին նշանակման կապակցությամբ՝ ՀՀ ոստիկանության շտաբի պետի տեղակալը բարձր է գնահատել ՀՀ ոստիկանության և Ֆրանսիայի ՆԳ նախարարության միջև փոխգործակցությունը հատկապես միջազգային համագործակցության ոլորտում:

Հանդիպման ընթացքում քննարկվել են ՀՀ ոստիկանության և Ֆրանսիայի ՆԳ նախարարության տարեկան գործողությունների ծրագիրը, համագործակցության ոլորտները, փոխադարձ հետաքրքրություն ներկայացնող մի շարք հարցեր։

ՀՀ ոստիկանություն կատարած այցի շրջանակներում պարոն Ժամեն հանդիպում է ունեցել նաև ՀՀ-ում Ինտերպոլի ԱԿԲ պետի հետ: Հանդիպման ընթացքում քննարկվել են երկու երկրների Ինտերպոլի ԱԿԲ-ի միջև համագործակցության ամրապնդմանն ուղղված հարցեր:

Մայիսի 10-ին Վրաստանում Ֆրանսիայի դեսպանության ներքին անվտանգության հարցերով կցորդ պարոն Էրվե Ժամեն մի շարք հանդիպումներ է ունեցել ՀՀ ոստիկանությունում։ ՀՀ ոստիկանության շտաբի պետի հետ հանդիպման ընթացքում քննարկվել են ՀՀ ոստիկանությունում ընթացող բարեփոխումները․ նոր ստեղծվող պարեկային ոստիկանության ծառայության, օպերատիվ կառավարման կենտրոնի, ՀՀ ոստիկանության և նոր ստեղծվող ներքին գործերի նախարարության գործառույթների բաժանման մասին։ Ֆրանսիացի գործընկերը  պատրաստակամություն է հայտնել աջակցել ՀՀ ոստիկանությանը ընթացող բարեփոխումներում և փոխանցել ֆրանսիական փորձը։

Նույն օրը  պարոն Ժամեն հանդիպում է ունեցել նաև ՀՀ ոստիկանության քրեական ոստիկանության գլխավոր վարչությունում և ՀՀ-ում Ինտերպոլի ԱԿԲ-ում։

 

Մեծ Բրիտանիայի և Հյուսիսային Իռլանդիայի Միացյալ Թագավորություն

  

 

2021թ. առաջին կիսամյակում ՀՀ-ում Միացյալ Թագավորության դեսպանության պաշտպանության բաժնի կողմից կազմակերպվել են անգլերեն լեզվի դասընթացներ, որոնց մասնակցում են ՀՀ ոստիկանության տարբեր ստորաբաժանումների 15 ծառայողներ:

Փետրվարի 3-ին ՀՀ ոստիկանության պետի տեղակալն ընդունել է ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության դեսպանության պատվիրակությանը՝ գործերի ժամանակավոր հավատարմատար տիկին Հելեն Ֆեյզիի գլխավորությամբ:

Ոստիկանության պետի տեղակալը կարևորել է դեսպանության աջակցությունը ոստիկանության ծառայողների համար անգլերեն լեզվի վերապատրաստման դասընթացների կազմակերպերպման գործում:

Հանդիպման ընթացքում ոստիկանության պետի տեղակալը ներկայացրել է ոստիկանությունում ընթացող լայնածավալ բարեփոխումները, որոնք ուղղված են Հայաստանի ոստիկանության արդիականացմանն ու ծառայությունների որակի բարձրացմանը:

 

Ճապոնիա

 

 

Ապրիլի 29-ին ՀՀ ոստիկանության շտաբում անցկացվել է հանդիպում ՀՀ-ում Ճապոնիայի դեսպանության հյուպատոսության և անվտանգության բաժնի նորանշանակ պետ, երկրորդ քարտուղար տիկին Իկիդա Սումիկոյի և իր առաքելությունը ՀՀ-ում ավարտող երկրորդ քարտուղար Տադահիրո Կիտամուրայի հետ։ Հյուրերին ներկայացվել է հանցավորության դեմ պայքարում տարվող վիճակագրությունը և ոստիկանությունում ընթացող բարեփոխումները։ Հանդիպման ավարտին համագործակցությունը շարունակելու պայմանավորվածություն է ձեռքբերվել։

 

Միջազգային կազմակերպություններ


Եվրոպական Միություն

 

Հունվարի 26-ին Եվրոպական միության EU4Digital նախաձեռնության շրջանակում Արևելյան գործընկերության պետությունների համար նախատեսված «Cybersecurity East Project» ծրագրի համատեքստում կայացել է «Introduction to Social Engineering and Basic Cyber Hygiene» խորագրով առցանց միջազգային սեմինարը, որին մասնակցել է ՀՀ ոստիկանության 1 ծառայող։

Փետրվարի 2-ին անցկացվել է «ՀՀ և ԵՄ միջև առանց թույլտվության բնակվող անձանց հետընդունման/ռեադմիսիայի» մասին համաձայնագրով ստանձնած հանձնարարությունների կատարման ընթացքի նկատմամբ մոնիթորինի իրականացման և ծագող խնդիրների լուծման նպատակով ստեղծված միջգերատեսչական աշխատանքային խմբի նիստը, որին մասնակցել է ՀՀ ոստիկանության 1 ծառայող։

Փետրվարի 15-ից 19-ը Եվրոպական հանձնաժողովի հարևանության ու ընդլայնման բանակցությունների հարցերով գլխավոր տնօրինության և արտաքին գործողության եվրոպական ծառայության կողմից իրականացվել է «առցանց առաքելություն», որի ժամանակ քննարկվել է ՀՀ-ԵՄ 2021-2027թթ. բազմամյա ինդիկատիվ ծրագրի նախագիծը։  Փետրվարի 15-ին կայացած առցանց հանդիպմանը ՀՀ ոստիկանությունից մասնակցել է ՀՀ ոստիկանության պետի տեղակալը։

Մարտի 12-ին ոստիկանության կողմից բերման ենթարկված անձանց իրավունքների թեմայով ՀՀ ոստիկանության շտաբում տեղի է ունեցել հանդիպում, որին մասնակցել են ՀՀ ոստիկանության 3 ծառայողներ և ՄԻՊ աշխատակազմի հետազոտական և կրթական կենտրոնի ղեկավար Նինա Փիրումյանը և ԵԱՀԿ ծրագրի համակարգող Ռուզաննա Բաղդասարյանը։ Հանդիպման ընթացքում քննարկվել են ոստիկանության կողմից բերման ենթարկվածների անձանց իրավունքների վերաբերյալ մի շարք օրենքներ, որոշումներ, հրամաններ և նախագծեր, ինչպես նաև պայմանավորվածություն է  ձեռքբերվել  շարունակել հետագա համագործակցությունը և վերոնշյալ թեմայի վերաբերյալ հանրությանն իրազեկելու ուղղությամբ աշխատանքներ կատարել։

Մարտի 4-ից 5-ը Եվրոպայի խորհրդի և Եվրոպական միության Cyber@East ծրագրի շրջանակներում անցկացվել է սեմինար, որի ընթացքում քննարկվել են «Կիբերհանցագործությունների» մասին կոնվենցիային, ինչպես նաև ոլորտին վերաբերող մի շարք հիմնահարցեր։ Սեմինարին մասնակցել է ՀՀ ոստիկանության 1 ծառայող։

Մարտի 10-ին ՀՀ փոխվարչապետ Մհեր Գրիգորյանի մոտ կայացել է ՀՀ-ԵՄ Համապարփակ և ընդլայնված գործընկերության համաձայնագրի և ՀՀ-ԵՄ Գործընկերության առաջնայնություններ փաստաթղթի կիրարկումն ապահովող միջոցառումները համակարգող միջգերատեսչական հանձնաժողովի անդամների հանդիպումը, որին մասնակցել է ՀՀ ոստիկանության պետի տեղակալը։

Մարտի 15-ից 19-ը ՀՀ ոստիկանության, ՀՀ արդարադատության նախարարության, ՀՀ ՏԿԵՆ Միգրացիոն ծառայության և ԵՄ փորձագետների մասնակցությամբ Թայեքս ծրագրի ներկայացուցիչների հետ տեղի են ունեցել առցանց հանդիպումներ, որոնց նպատակն էր տրամադրել առաջարկություններ ոստիկանության բարեփոխումների ռազմավարության շրջանակներում 2021 թվականի ավարտին ձևավորվող ներքին գործերի նախարարության կառուցվածքի վերաբերյալ։

Փորձագիտական առաքելության շրջանակներում ներկայացվել են ԵՄ անդամ երկրների ներքին գործերի նախարարությունների լավագույն գործառնական կառուցվածքները, ՀՀ ոստիկանության առկա կառուցվածքը։ Տրվել են  առաջարկություններ ներքին գործերի նախարարության օպտիմալ և արդյունավետ կառուցվածքի վերաբերյալ։ Ներկայացվել են նաև ինտեգրված միգրացիոն և անձնագրային ծառայությունները, ինչպես նաև հանրային ծառայությունների մատուցման կենտրոնները։ Առցանց միջոցառմանը մասնակցել է ՀՀ ոստիկանության պետի տեղակալի գլխավորած պատվիրակությունը։

Ապրիլի 20-ին ՀՀ ոստիկանությունում տեղի է ունեցել անօրինական միգրացիայի ոլորտում կատարվող հանցագործությունների կանխարգելման և բացահայտման ուղղությամբ իրականացվող միջոցառումներն ավելի արդյունավետ դարձնելու վերաբերյալ աշխատանքային քննարկում։ Քննարկմանը մասնակցել են ՀՀ ոստիկանության 2 ծառայողներ և ՀՀ արտաքին գործերի նախարարության հյուպատոսական վարչության վիզաների բաժնի պետ Արթուր Պետրոսյանը։

Հանդիպման ընթացքում քննարկվել են ՀՀ քաղաքացիների կողմից ապօրինի կերպով Եվրոպական միության անդամ պետություններ մուտք գործելուն առնչվող հարցեր, ինչպես նաև օտարերկրյա քաղաքացիների կողմից ապօրինի ճանապարհով ՀՀ մուտք գործելու և ՀՀ տարածքը որպես տարանցիկ գոտի օգտագործելու վերաբերյալ հարցեր։

Ապրիլի 28-ին կայացել է ՀՀ-ԵՄ Մուտքի արտոնագրերի դյուրացման հարցերով համատեղ կոմիտեի 6-րդ նիստը, որին մասնակցել է ՀՀ ոստիկանության պետի տեղակալը։

Մայիսի 6-ից 7-ը Արևելյան գործընկերության երկրների համար նախատեսված Եվրոպայի խորհրդի և Եվրամիության Cyber@East համատեղ ծրագրի շրջանակներում Հայաստանի ներկայացուցիչների համար կազմակերպվել էր «Բաժանորդների տվյալների և տեղեկատվության պահպանման շաբլոնների ուսուցում» թեմայով առցանց դասընթացը, որին մասնակցել են ոստիկանության 4 ծառայողներ։

Մայիսի 14-ին անցկացվել է «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման (ռեադմիսիայի) մասին» համաձայնագրով ստանձնած հանձնառությունների կատարման ընթացքի նկատմամբ մոնիթորինգ իրականացնելու և ծագող խնդիրները քննարկելու նպատակով ստեղծված միջգերատեսչական աշխատանքային խմբի հերթական նիստը, որին մասնակցել է ՀՀ ոստիկանության 2 ծառայող։

Մայիսի 24-ից 25-ը Cyber@East և CyberSecurityEAST ծրագրերի շրջանակներում անցկացվել է «Իրավապահ մարմինների և համակարգչային անվտանգության միջադեպերի արձագանքման միջև համագործակցության գործառնական ընթացակարգերի մշակման վերաբերյալ» սեմինարը, որին մասնակցել է ՀՀ ոստիկանության 2 ծառայող։

Մայիսի 27-ին անցկացվել է Արդարադատության, ազատության և անվտանգության հարցերով Հայաստան-ԵՄ ենթակոմիտեի 10-րդ նիստը՝ առցանց ձևաչափով։ Նիստի ընթացքում քննարկվել են թմրամիջոցների ապօրինի շրջանառությանը, թրաֆիքինգին և ոստիկանությունում ընթացող բարեփոխումներին առնչվող հարցեր։ Մասնակցել է ոստիկանության 2 ծառայող։

Միևնույն ժամանակ, ՀՀ ոստիկանության ծառայողները մասնակցել են ԵՄ շրջանակներում տեսակոնֆերանսի ձևաչափով կազմակերպված մի շարք հանդիպումներին ևս:

 

 ԵԱՏՄ

 

Հունվարի 20-ին և 21-ին ԵԱՏՄ ներքին շուկայում բացառումների և սահմանափակումների ցանկի վերաբերյալ հարցերի քննարկման նպատակով անցկացվել են առցանց նիստեր, որոնց մասնակցել է ՀՀ ոստիկանության 10 ծառայող։

Ապրիլին, մայիսին և հունիսին անցկացվել են Եվրասիական տնտեսական հանձնաժողովի կոլեգիային կից Միգրացիոն քաղաքականության խորհրդատվական կոմիտեի առցանց նիստերը, որոնց մասնակցել է ՀՀ ոստիկանության 2-ական ծառայող։


 

 

 

 

 

ԵՎՐՈՊՈԼ  

2021թ. առաջին կիսամյակի ընթացքում ՀՀ ոստիկանության, Արտաքին գործերի, Արդարադատության նախարարությունների և Եվրոպոլի ներկայացուցիչների միջև կայացել են մի շարք առցանց հանդիպումներ, որոնց ընթացքում քննարկվել են «Հայաստանի Հանրապետության իրավապահ մարմինների և Եվրոպական միության իրավապահ ոլորտում համագործակցության գործակալության միջև համագործակցության հաստատման վերաբերյալ» աշխատանքային համաձայնագրի նախագիծը, համաձայնագրի ստորագրման և հետագա համագործակցության համար անհրաժեշտ քայլերը։

Քննարկումների արդյունքում համաձայնագիրը բերվել է ավարտական տեսքի, անցել է համապատասխան ընթացակարգեր նաև Եվրոպոլում: Համաձայնագրի ստորագրումը նախատեսվում է առաջիկայում։

Եվրոպայի Խորհուրդ

 

Հաշվետու ժամանակահատվածում շարունակվել է համագործակցությունը Եվրոպայի խորհրդի հետ «Հայաստան-Եվրոպայի խորհուրդ 2019-2022թթ. գործողությունների ծրագրի» շրջանակներում ընտանեկան բռնության, խոշտանգումների և վատ վերաբերմունքի կանխարգելման, կիբերհանցավորության և այլ ուղղություններով։

Փետրվարի 4-ին Եվրոպայի խորհրդի հետ համատեղ իրականացվող «Աջակցություն Հայաստանում պրոբացիայի ծառայության զարգացմանը» ծրագրի շրջանակներում էլեկտրոնային կառավարման համակարգի  (e-probation) մշակման և ներդրման նպատակով ՀՀ ոստիկանությունում անցկացվել է հանդիպում գնահատողական առաքելության հետ, որին մասնակցել է ոստիկանության 5 ծառայող։

Փետրվարի 5-ին Եվրոպայի խորհրդի երևանյան գրասենյակի կողմից իրականացվող «Եվրոպայի խորհրդի կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին կոնվենցիայի վավերացման ուղին Հայաստանում» ծրագրի շրջանակներում անցկացվել է Համակարգող խորհրդի տարեկան նիստը՝ առցանց ձևաչափով, որին մասնակցել է ՀՀ ոստիկանության 2 ծառայող։

Ապրիլի 8-ին Եվրոպայի խորհրդի երևանյան գրասենյակի կողմից կազմակերպվել էր ատելության քարտեզագրման նախնական դասընթաց, որին մասնակցել են ՀՀ ոստիկանության կրթահամալիրի 2 ծառայողներ։

Ապրիլի 8-ից 9-ը Եվրոպայի խորհրդի և Եվրոպական միության համատեղ «Արդարադատության մատչելիության խթանում Արևելյան գործընկերության երկրներում խտրականության, ատելության հանցագործությունների և ատելության խոսքի զոհերի համար` արտադատական կարգով փոխհատուցման մեխանիզմների միջոցով» ծրագրի շրջանակներում անցկացվել են «Ատելության խոսք․ սահմանում, չափանիշներ, դրա դեմ պայքարելու միջոցներ» և «Հայաստանում ատելության խոսքի ազգային կարգավորումների համակարգված քարտեզագրման դասընթացի մեկնարկ» առցանց դասընթացները, որոնց մասնակցել է ՀՀ ոստիկանության 1 ծառայող։

Եվրոպական միության և Եվրոպայի խորհրդի կողմից համատեղ ֆինանսավորվող և Եվրոպայի խորհրդի կողմից իրականացվող «Արդարադատության մատչելիության խթանում Արևելյան գործընկերության երկրներում խտրականության, ատելության հանցագործությունների և ատելության խոսքի զոհերի համար` արտադատական կարգով փոխհատուցման մեխանիզմների միջոցով» ծրագրի շրջանակներում Եվրոպայի խորհրդի կողմից 2021թ. առաջին կեսին իրականացվող Հայաստանում ատելության խոսքի կարգավորումների քարտեզագրման գործողությունների շրջանակում ապրիլի 30-ին տեղի է ունեցել առցանց խմբային հարցազրույց ՀՀ ոստիկանության 3 ներկայացուցիչների հետ։ Հարցազրույցի ընթացքում ՀՀ ոստիկանության ներկայացուցիչները պատասխանել են ԵԽ փորձագետների հարցերին, ներկայացրել են իրենց կողմից տարվող աշխատանքները, ինչպես նաև մանրամասնել են ՀՀ ոստիկանության գործողությունները ատելության խոսքը կանխելու գործում և ներկայացրել ձեռնարկված միջոցառումները։ Հարցազրույցի վերջում ներկայացվել են առաջարկություններ Հայաստանում ատելության խոսքի կարգավորումների քարտեզագրման վերաբերյալ։

Հունիսի 4-ին Արմենիա Մարիոթ հյուրանոցում ՀՀ արդարադատության նախարարության և ԵԽ երևանյան գրասենյակի հետ համատեղ անցկացվել է խտրականության, ատելության խոսքի և ատելության հիմքով կատարվող հանցագործությունների տարանջատված տվյալների հավաքագրման ոլորտում բարեփոխումների իրականացման վերաբերյալ քննարկում, որին մասնակցել են ոստիկանության 2 ծառայողներ։


Ինտերպոլ

 

 

Հունվարին 20-ին Ինտերպոլի Գլխավոր քարտուղարության կողմից կազմակերպվել է Ինտերպոլի եվրոպական կապի սպաների 30-րդ առցանց հանդիպումը, որին մասնակցել է Ինտերպոլի ԱԿԲ-ի ծառայողը։   

Փետրվարի 2-ին առցանց եղամակով կայացել է Ինտերպոլի եվրոպական կոմիտեի 87-րդ հանդիպումը, որին մասնակցել է ՀՀ-ում Ինտերպոլի ԱԿԲ-ի պետը։ Հանդիպման ժամանակ ամփոփվել են նախորդ՝ 86-րդ հանդիպման արդյունքները, քննարկվել են Եվրոպայի տարածաշրջանի  համար նախապատրաստվող բիզնես պլանի կետերը, ԻԵԿ-ի անդամների մանդատի փոփոխությունները, ներկայացվել են Ինտերպոլի INSIGHT նոր վերլուծական հարթակի հնարավորություններն ու ծավալները։

Փետրվարի 12-ին ՀՀ-ում Ինտերպոլի ազգային կենտրոնական բյուրոյում Գերմանիայի իրավապահ մարիմինների և ՀՀ-ում Գերմանիայի դեսպանության ներկայացուցիչների հետ անցկացվել է հանդիպում, որի ժամանակ քննարկվել են ՀՀ-ում ձերբակալված Գերմանիայի կողմից հետախուզվող անձնին արտահանձնելու վերաբերյալ հարցեր։

Ապրիլի 13-ին կայացել է Ինտերպոլի գլխավոր քարտուղարության կողմից կազմակերպված «Geiger»  աշխատանքային խմբի հերթական առցանց հանդիպումը Սևծովյան տարածաշրջանի, Կովկասի և Կենտրոնական Ասիայի տարածաշրջանային երկրների ներկայացուցիչների մասնակցությամբ, որի ընթացքում  քննարկվել են ռադիոակտիվ և միջուկային ահաբեկչության հնարավոր վտանգներին, դրանց դեմ պայքարի ազգային և միջազգային փորձին, նշված ոլորտում կիբեռհարձակումների հնարավոր վտանգներին և դրանց կանխարգելման մեթոդիկային առնչվող հարցեր։ Հանդիպմանը մասնակցել են ոստիկանության 2 ծառայողներ։

Մայիսի 12-ին Ինտերպոլի գլխավոր քարտուղարության կողմից անցկացվել է Կանանց մտավոր սեփականության դեմ ուղղված հանցագործությունների վերաբերյալ հարցերի առցանց քննարկումը, որին մասնակցել են ոստիկանության 2 ծառայողներ։

Մայիսի 19-ին Ինտերպոլի գլխավոր քարտուղարության կողմից անցկացվել է «Թմրամիջոցների ապօրինի շրջանառություն. Աֆղանստանից ստացված մետամֆիտամին» թեմայով սեմինարը, որին մասնակցել է ոստիկանության 1 ծառայող։

Մայիսի 25-ից 28-ը Քաղաքացիական ավիացիայի միջազգային կազմակերպության (ԻԿԱՕ) կողմից ուղևորների նույնականացման ծրագրի շրջանակներում Ինտերպոլի հետ համագործակցությամբ անցկացվել է 16-րդ առցանց սիմպոզիումը՝ ուղևորների տվյալների փոխանակման թեմայով։ Մասնակցել է ոստիկանության 1 ծառայող։

Հունիսի 8-ին Ինտերպոլի գլխավոր քարտուղարության կողմից անցկացվել է «3rd INTERPOL Global Conference on Illicit Drug and Substance» թեմայով առցանց կոնֆերանսը, որին մասնակցել է ՀՀ ոստիկանության 1 ծառայող։ Կոնֆերանսին ներկայացվել են թմրանյութերի անօրինական շրջանառության դեմ պայքարում իրականացված լայնածավալ գործունեությունը, մի շարք օպերացիաների արդյունքները։

Հունիսի 9-ին Ինտերպոլի գլխավոր քարտուղարության կողմից անցկացվել է Հանցավորության, պայմանավորված մրցախաղերի և անօրինական մոլախաղերի դեմ պայքարին ուղղված վեբինար, որին մասնակցել է ՀՀ-ում Ինտերպոլի ԱԿԲ-ի ներկայացուցիչը։

Միևնույն ժամանակ, ՀՀ ոստիկանության ծառայողները մասնակցել են Ինտերպոլի շրջանակներում հեռավար եղանակով կազմակերպված մի շարք հանդիպումներին ևս:

 

CEPOL

 

 

Հաշվետու ժամանակահատվածում շարունակվել է սերտ համագործակցությունը Եվրոպական միության իրավապահ մարմինների ուսուցման գործակալության (CEPOL) հետ՝ CEPOL-ի կապի ազգային մարմնի ներկայացուցիչ հանդիսացող ոստիկանության ծառայողի միջոցով իրավապահ մարմինների ծառայողների համար ռեզիդենտալ վերապատրաստման դասընթացների կազմակերպման ուղղությամբ։

Փետրվարի 24-ին, մարտի 11-ին  անցկացվել է ՀՀ Արդարադատության կողմից համակարգվող ԵՄ Կազմակերպված հանցավորության դեմ պայքարի վերապատրաստում և գործառնական համագործակցություն (TOPCOP) տարածաշրջանային ծրագրի կազմակերպիչների առցանց հանդիպումը, որին մասնակցել է CEPOL-ի ազգային կոնտակտային անձ հանդիսացող ՀՀ ոստիկանության կրթահամալիրի ներկակայացուցիչը։ Հանդիպման ընթացքում քննարկվել են ծրագրի առանձնահատկությունները։

Մարտի 29-ին ԵՄ կազմակերպված հանցավորության դեմ պայքարի վերապատրաստում և գործառնական համագործակցություն (TOPCOP) տարածաշրջանային ծրագրի շրջանակներում անցկացվել է առցանց հանդիպում, որի ընթացքում ներկայացվել են ծրագրի շրջանակներում նախատեսված դասընթացների վերաբերյալ ՀՀ ազգային կարիքները։ Այնուհետև մայիսի 6-ին և 11-ին ամփոփվել են ազգային կարիքների գնահատման հարցաշարերի արդյունքները։ Հանդիպումներին մասնակցել է CEPOL-ի ազգային կոնտակտային անձ հանդիսացող ՀՀ ոստիկանության կրթահամալիրի ներկակայացուցիչը։

Ապրիլի 14-ին անցկացվել է Եվրոպական միության իրավապահ մարմինների ուսուցման գործակալության (CEPOL) ազգային կառույցների 9-րդ առցանց հանդիպումը, որին մասնակցել է ոստիկանության ծառայող, որը հանդիսանում է CEPOL-ի կապի ազգային մարմնի ներկայացուցիչ։ Հանդիպման ընթացքում քննարկվել են Գործակալության 2021թ. դրամաշնորհների տրամադրման և 2022 թ. դրամաշնորհների կապակցությամբ առաջարկվող դասընթացների, էլեկտրոնային ուսուցման նախագծերի, անձնական և գործնական հմտությունների կատարելագործմանն ուղղված ինքնուրույն ուսուցման էլեկտրոնային գործիքների, ԵՄ ռազմավարական և գործառնական կրթական կարիքների գնահատման, փոխանակման 2021թ. ծրագրի ընթացիկ վիճակի, կարողությունների զարգացման նախագծերի և արտաքին կապերի զարգացման վերաբերյալ հարցեր։

Ապրիլի 8-ին Եվրոպական միության իրավապահ մարմինների ուսուցման գործակալության կողմից անցկացվել է «Վերջին կիբեռսպառնալիքների վերլուծություն» թեմայով առցանց վեբինարը, որին մասնակցել է ոստիկանության 1 ծառայող։

Մայիսի 12-ին անցկացվել է Եվրոպական միության իրավապահ մարմինների ուսուցման գործակալության (CEPOL) Փոխանակման 2021թ. ծրագրին նվիրված վեբինարը, որին մասնակցել է ոստիկանության 1 ծառայող։

Մայիսի 25-ից 26-ը ՀՀ ոստիկանության ներկայացուցիչը մասնակցել է ԵՄ կազմակերպված հանցավորության դեմ պայքարի վերապատրաստում և գործառնական համագործակցություն (TOPCOP) տարածաշրջանային ծրագրի շրջանակներում  «Պատկերացում ռազմավարական վերլուծության և սպառնալիքների գնահատման գործընթացի վերաբերյալ» խորագրով ներածական սեմինարին։

Հունիսի 4-ին անցկացվել է Եվրոպական միության իրավապահ մարմինների ուսուցման գործակալության (CEPOL) ազգային կառույցների ներկայացուցիչների երկրորդ ոչ պաշտոնական առցանց հանդիպումը, որի ընթացքում քննարկվել են ռեզիդենտալ և առցանց դասընթացների տեսակները, մասնակցության պայմանները և փոխանակման ծրագրերի վերաբերյալ հարցեր։ Մասնակցել է ՀՀ ոստիկանության 1 ծառայող։

ԵԱՀԿ

 

 

Հաշվետու ժամանակահատվածում Ոստիկանության բարեփոխումների ծրագրից բխող համայնքային ոստիկանության վիրաիմաստավորման գործընթացի շրջանակներում ԵԱՀԿ և ՄԱԿ-ի փորձագետների մասնակցությամբ համայնքային ոստիկանության լավագույն փորձի փոխանակման նպատակով անցկացվել են առցանց աշխատանքային քննարկումներ, որոնց ընթացքում Ղազախստանի, Կանադայի, Էստոնիայի, Նորվեգիայի և Շվեդիայի փորձագետները ներկայացրել են իրենց երկրների փորձը համայնքային ոստիկանության ոլորտում։ Քննարկումների արդունքներով ՀՀ կողմից կընտրվեն համայնքային ոստիկանության՝ Հայաստանի Հանրապետությանը համապատասխանող երկրների մոդելները, ինչպես նաև փորձագետները, որոնք աջակցություն կցուցաբերեն ծառայության բարեփոխման ընթացքում։

2021թ. հունիսի 20-ին նախատեսվող ՀՀ արտահերթ խորհրդարանական ընտրությունների ժամանակ դիտորդական առաքելություն իրականացնելու նպատակով ԵԱՀԿ/ԺՀՄԻԳ կողմից կարիքների գնահատման պատվիրակության այցի շրջանակներում  ապրիլի 29-ին ՀՀ ոստիկանության պետի տեղակալը և ՀՀ ոստիկանության անձնագրային և վիզաների վարչության պետն առցանց հանդիպում են ունեցել  ԵԱՀԿ/ԺՀՄԻԳ ընտրական հարցերով խորհրդատու Համա Մունյիկվայի հետ: Հանդիպման ընթացքում կարևորվել է համագործակցությունը՝ ընտրությունների ընթացքում ոստիկանության աշխատանքի արդյունավետության բարձրացման համատեքստում: Խոսվել է ընտրողների ցուցակների կատարելագործման ու նախընտրական շրջանում հավաքների անցկացման խնդրի մասին:

Մայիսի 10-ին ՀՀ ոստիկանության և ԵԱՀԿ ԺՀՄԻԳ ներկայացուցիչների միջև տեղի ունեցավ «Ատելության հողի վրա կատարված հանցագործությունների դեմ պայքար» թեմայով իրավապահ մարմինների վերապատրաստման ծրագրի շրջանակներում կարիքների գնահատման վերաբերյալ առցանց հանդիպում, որի ընթացքում քննարկվեցին ատելության հողի վրա կատարված հանցագործությունների վերաբերյալ ՀՀ օրենսդրական կարգավորումները, ինչպես նաև ՀՀ ոստիկանության գործունեության առանձնահատկությունները վերոնշյալ ոլորտում։

2021թ. հունիսի 20-ին նախատեսվող ՀՀ արտահերթ խորհրդարանական ընտրությունների ժամանակ ԵԱՀԿ/ԺՀՄԻԳ կողմից դիտորդական առաքելության իրականացման ընթացքում անվտանգության հետ կապված հարցերի քննարկման նպատակով մայիսի 21-ին ՀՀ ոստիկանությունում տեղի է ունեցել հանդիպում  ԵԱՀԿ/ԺՀՄԻԳ անվտանգության փորձագետ Լասլո Բելագիի հետ, որի ընթացքում քննարկվել են փոխադարձ հետաքրքրություն ներկայացնող մի շարք հարցեր։

Մայիսի 25-ին ԵԱՀԿ ԺՀՄԻԳ Ատելության հողի վրա կատարված հանցագործությունների դեմ պայքարի թեմայով իրավապահ մարմինների վերապատրաստման ծրագրի շրջանակներում անցկացվել է առցանց աշխատաժողով, որին մասնակցել են ՀՀ ոստիկանության 18 ծառայողներ։

Հունիսի 8-ին ՀՀ-ում Ուղևորների նախնական տեղեկատվության համակարգի ներդրման շրջանակում ԵԱՀԿ անդրազգային սպառնալիքների վարչության սահմանային անվտանգության և կառավարման ստորաբաժանման կողմից կազմակերպվեց առցանց կլոր սեղան-քննարկում, որին մասնակցել են ՀՀ ոստիկանության անձնագրային և վիզաների վարչության և ՀՀ-ում Ինտերպոլի ԱԿԲ-ի ներկայացուցիչները։ Քննարկվել են ՀՀ-ում Ուղևորների նախնական տեղեկատվության համակարգի ներդրման հետ կապված հարցեր։

Հունիսի 16-ին ՀՀ ոստիկանությունում տեղի է ունեցել հանդիպում ԵԱՀԿ/ԺՀՄԻԳ դիտորդական առաքելության և ոստիկանության ներկայացուցիչների  միջև։ Հանդիպման ընթացքում քննարկվել են ԵԱՀԿ/ԺՀՄԻԳ կարճաժամկետ դիտորդների հետ կապված հարցեր։

 

Միավորված Ազգերի Կազմակերպություն

 

 

Հաշվետու ժամանակահատվածում խոշտանգումների և անմարդկային վերաբերմունքի այլ դեպքերը կանխելու, բացահայտելու նպատակով կատարված աշխատանքների մասին հանրությանը իրազեկելու նպատակով ՄԱԿ-ի Զարգացման ծրագրի աջակցությամբ և ՀՀ ոստիկանության համապատասխան ստորաբաժանումների ծառայողների ներգրավմամբ մշակվել և շրջանառության մեջ են դրվել տեղեկատվական տեսաերիզ և բուկլետներ: ՄԱԿ-ի Զարգացման ծրագրի աշխատակիցները՝ միջազգային այլ կազմակերպությունների հետ համատեղ ներգրավվել են նաև ՀՀ ոստիկանությունում նոր Պարեկային ծառայության ներդրման աշխատանքներում։

Միևնույն ժամանակ անցկացվել են ՄԱԿ-ի թմրամիջոցների և հանցավորության դեմ պայքարի գրասենյակի և Համաշխարհային մաքսային կազմակերպության բեռնարկղերի վերահսկողության ծրագրի Ռազմավարական առևտրի և արտահանման վերահսկման միջտարածաշրջանային հեռավար դասընթացներ, որոնց մասնակցել է ՀՀ ոստիկանության 4 ծառայող։

Փետրվարի 5-ին և հունիսի 22-ին ՀՀ ոստիկանության շտաբում տեղի է ունեցել հանդիպում ՀՀ ոստիկանության և ՄԱԶԾ, ԵԱՀԿ և ՀՀ արդարադատության ներկայացուցիչների միջև՝ ՄԱԶԾ և ԵՄ կողմից նախաձեռնված «Հաշվետու ինստիտուտներ և մարդու իրավունքների պաշտպանությունը Հայաստանում»  ծրագրի ներկայացման նպատակով։ Ծրագրի նպատակն է աջակցություն ցուցաբերել ՀՀ ոստիկանությունում իրականացվող բարեփոխումներին, մասնավորապես՝ համայնքային ոստիկանության բարելավման, կրթական համակարգի արդիականացման և նոր ուսումնական ծրագրերի ներդրման, հանրային հարցման կազմակերպման և այլ ուղղություններով։

Փետրվարի 22-ին ՀՀ ոստիկանության անձնագրային և վիզաների վարչությունում անցկացվել է ՄԱԿ փախստականների հարցերով գերագույն հանձնակատարի հայաստանյան գրասենյակի և ՀՀ ոստիկանության միջև արդյունավետ համագործակցությանն ուղղված հարցերի քննարկում։

Փետրվարի 15-ից 17-ը անցկացվել է ՄԱԿ թմրամիջոցների և հանցավորության հարցերով գրասենյակի (UNODC) կողմից կազմակերպված Անդրազգային կազմակերպված հանցավորության դեմ պայքարի կոնվենցիայի կիրառման գնահատման համար նշանակված փորձագետների առցանց քննարկումը, որին մասնակցել է ՀՀ ոստիկանության 1 ծառայող։

Մարտի 25-ին և 26-ին անցկացվել է ՄԱԿ-ի անդրսահմանային կազմակերպված հանցավորության դեմ պայքարի կոնվենցիայի կողմերի կոնֆերանսի (UNTOC) միջազգային համագործակցության վերաբերյալ աշխատանքային խմբի 12-րդ նիստը, որին մասնակցել են ՀՀ ոստիկանության 2 ծառայողներ։

Ապրիլի 6-ին ՄԱԿ ԱԽ Կանայք, խաղաղություն և անվտանգություն 1325 բանաձևի դրույթների իրականացման ՀՀ գործողությունների 2019-2021թթ. ազգային ծրագրի ուղղությամբ աշխատանքների քննարկման շրջանակներում անցկացվել է առցանց հանդիպում, որին մասնակցել է ՀՀ ոստիկանության ներկայացուցիչը։

Ապրիլի 12-ից 16-ը անցկացվել է ՄԱԿ Թմրանյութերի ապօրինի շրջանառության դեմ պայքարի հանձնաժողովի 64-րդ նստաշրջանը, որի ընթացքում քննարկվել են թմրամիջոցների անդրազգային ապօրինի շրջանառության դեմ պայքարին վերաբերող հարցեր, մշակվել են թմրամիջոցների ապօրինի շրջանառությամբ զբաղվող անդրազգային հանցավոր խմբավորումների դեմ պայքարի եղանակներ։ Նստաշրջանին մասնակցել է ոստիկանության 1 ծառայող։

Ապրիլի 13-ից 15-ը Թմրամիջոցների դեմ պայքարի հանձնաժողովի 64-րդ նստաշրջանի շրջանակներում անցկացվել են ՄԱԿ-ի Թմրամիջոցների և հանցավորության դեմ պայքարի գրասենյակի (UNODC) կողմից կազմակերպված «Իրական ժամանակում թմրանյութերի տվյալների ռազմավարական նշանակությունը» և «Նոր ARQ մեկնարկային բլոկների վերաբերյալ» թեմաներով առցանց քննարկումները, որոնց մասնակցել է ՀՀ ոստիկանության 1 ծառայող։

Մայիսի 10-ից 12-ը ՄԱԿ-ի Անդրսահմանային կազմակերպված հանցավորության դեմ պայքարի կոնվենցիայի կողմերի կոնֆերանսի (UNTOC) շրջանակներում անցկացվել է Հրազենի հարցերով աշխատանքային խմբի 8-րդ  առցանց նիստը, որին մասնակցել է ոստիկանության 1 ծառայող։ Նիստին քննարկվել են կրիպտոարժույթների միջոցով զենքերի ապօրինի շրջանառությանն առնչվող հարցեր։

Մայիսի 18-ին ՀՀ պետական եկամուտների կոմիտեում կայացել է ՄԱԿ-ի Թմրամիջոցների և հանցավորության դեմ պայքարի գրասենյակի և Համաշխարհային մաքսային կազմակերպության Բեռնարկղերի վերահսկողության ծրագրի տարածաշրջանային համակարգող Նաիդա Չամիլովայի հետ հանդիպումը, որի ընթացքում քննարկվել են համագործակցության ամրապնդմանն ուղղված հարցեր։ Հանդիպմանը մասնակցել է ՀՀ ոստիկանության 1 ծառայող։

Հունիսի 4-ին Գյումրի քաղաքում ՄԱԿ Փախստականների հայաստանյան գրասենյակի և Հայկական Կարմիր խաչ ընկերության կողմից կազմակերպվել էր «Փախստականների և ապաստան հայցողների պաշտպանության միջազգային և ազգային չափանիշներ» թեմայով դասընթաց, որին մասնակցել են ՀՀ ոստիկանության անձնագրային և վիզաների վարչության Բավրայի բաժանմունքի ծառայողները։

 

Ֆրանկոֆոնիայի միջազգային կազմակերպություն

 

 

Հունիսի 16-ին ՀՀ ոստիկանություն էր այցելել Ֆրանկոֆոնիայի միջազգային կազմակերպության պատվիրակությունը։ Պատվիրակությանն ընդունել է ՀՀ ոստիկանության պետի տեղակալը։ Հանդիպման ընթացքում քննարկվել են արտահերթ խորհրդարանական ընտրությունների ժամանակ ոստիկանության գործողություններին առնչվող հարցեր։

 

ՀԱՊԿ

 

 

Հունվարի 26-ին և 27-ին անցկացվել է ՀԱՊԿ հավաքական անվտանգության համակարգի ուժերի և միջոցների կառավարման մարմինների ու կազմավորումների համատեղ պատրաստման 2022թ. պլանի նախագծի քննարկում, որին մասնակցել են ՀՀ ոստիկանության 2 ծառայողներ։

Մարտի 10-ից 23-ը ՀԱՊԿ անդամ պետությունների իրավապահ մարմինների աշխատակիցների համար կազմակերպվել է հեռավար դասընթաց ՌԴ ՆԳՆ Նիժնի Նովգորոդի ակադեմիայում, որին մասնակցել է ոստիկանության 2 ծառայող։

Մարտի 31-ին անցկացվել է ՀԱՊԿ «Նելեգալ» տարածաշրջանային գորողության միջազգային շտաբի առցանց նիստը, որին մասնակցել են ՀՀ ոստիկանության 3 ծառայողներ։

Մարտի 29-ից 31-ը Մոսկվայում կայացել է Պրոքսի գործողության ազգային շտաբերի ղեկավարների և նրանց ներկայացուցիչների խորհրդակցությունը, որին մասնակցել է ոստիկանության 1 ծառայող։

ՀՀ-ում «Գրոմ-2021» համատեղ զորավարժություն կազմակերպելու և անցկացնելու հարցերով մեթոդական օգնություն ցուցաբերելու նպատակով ապրիլի 6-ից 9-ը և հունիսի 1-ից 3-ը Երևանում անցկացվել են շտաբային բանակցություններ, որոնց մասնակցել են ՀԱՊԿ քարտուղարության, Բելառուսի ՆԳՆ, Ղրղզական ՆԳՆ, ՌԴ ՆԳՆ, Տաջիկստանի և ՀՀ պետական մարմինների ներկայացուցիչներ։

Ապրիլի 28-ին անցկացվել է ՀԱՊԿ շրջանակներում անցկացվելիք թմրանյութերի դեմ պայքարի գործողությունների կազմակերպման հարցերով աշխատանքային խմբի առցանց նիստը, որին մասնակցել է ՀՀ ոստիկանության ներկայացուցիչը։

Մայիսի 12-ից 25-ը ՀԱՊԿ շրջանակներում անցկացվել է կրիպտոարժույթների և էլեկտրոնային դրամապանակների վերաբերյալ առցանց դասընթաց, որին մասնակցել է ոստիկանության 2 ծառայող։  

Մայիսի 20-ին անցկացվել են «Կոբալտ-2021» համատեղ զորավարժություն կազմակերպելու և անցկացնելու շատաբային առցանց բանակցությունները, որոնց մասնակցել է ոստիկանության 1 ծառայող։

Հունիսի 21-ից 25-ը Տաջիկստանի մայրաքաղաք Դուշանբեում «Канал» տարածաշրջանային հակաթմրանյութային միջոցառման շրջանակներում անցկացվել է «Канал-Гранитный бастион» ենթատարածաշրջանային հակաթմրանյութային միջոցառումը, որին մասնակցել է ոստիկանության 1 ծառայող։

 

ԱՊՀ

 

 

Փետրվարի 17-ին կայացել է «Անօրինական միգրացիայի դեմ պայքարում ԱՊՀ մասնակից պետությունների համագործակցության մասին» 1998 թվականի մարտի 6-ի համաձայնագրի մասնակից պետությունների համատեղ հանձնաժողովի (Համատեղ հանձնաժողով) 23-րդ նիստը, որին մասնակցել են ՀՀ ոստիկանության 4 ծառայողներ։

Մարտի 5-ից 30-ը ՌԴ ՆԳՆ Կառավարման ակադեմիայում անցկացվել է «ԱՊՀ մասնակից երկրների իրավապահ և իրավասու այլ մարմինների փոխգործակցության կազմակերպաիրավական հիմքերը» թեմայով մեկամսյա դասընթացների շարքը, որին մասնակցել է ոստիկանության 1 ծառայող։

ԱՊՀ «Ծառայությունների ազատ առևտրի մասին» Համաձայնագրի նախագծի խնդրահարույց հարցերի քննարկման նպատակով  ապրիլի 8-ից 9-ը և հունիսի 29-ին անցկացվել են  առցանց հանդիպումներ, որոնց մասնակցել է ՀՀ ոստիկանության ներկայացուցիչը։

 

Միևնույն ժամանակ, ՀՀ ոստիկանության ծառայողները մասնակցել են միջազգային համագործակցության շրջանակներում կազմակերպված մի շարք հանդիպումների ևս: