Նոր Նորքի ոստիկանների աչալրջության ու հետևողականության արդյունքում հայտնաբերվեց ատրճանակ
Օգոստոսի 8-ին` ժամը 14-ին, Համայնքային ոստիկանության Նոր Նորքի բաժնի ծառայողները Նանսենի փողոցում նկատել են մի մեքենա, որի մեջ գտնված անձինք, իրենց տեսնելով, ինչ-որ բան են թաքցրել սրահում, ապա իջել, փակել ավտոմեքենայի դռներն ու փախել:
Հետապնդումը կարճ է տևել: Ապօրինի զենք-զինամթերք պահելու կասկածանքով ձերբակալվել և բաժին են տեղափոխվել 30 և 31 տարեկան երկու երիտասարդ:
Նանսենի փողոցում գտնվող մեքենան վերցվել է հսկողության:
Կազմված փաստաթղթերն ուղարկվել են քննչական բաժին, որտեղ նախաձեռնված քրեական վարույթի շրջանակում օգոստոսի 9-ին խուզարկվել է մեքենան: Հայտնաբերվել է «Տրամադոլ» տեսակի մեկ դեղահաբ, գաղտնի փականով երկու դանակ և մեկ ատրճանակ։
Հանգամանքները նախաքննությամբ պարզվում են:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
