Ոստիկանները խուլիգանության կասկածանքով ձերբակալել են երիտասարդների և ներկայացրել նախաքննական մարմին
Սեպտեմբերի 5-ին՝ ժամը 23-ի սահմաններում, ՆԳՆ ոստիկանության օպերատիվ կառավարման կենտրոն է զանգահարել Գյումրի քաղաքի 19-ամյա մի բնակչուհի և հայտնել, որ մի տղամարդ մեքենան վարել է իր և 18-ամյա ընկերուհու ուղղությամբ, ապա հայհոյել և զենք է պահել իր ուղղությամբ։
Համայնքային ոտիկանության Կումայրիի բաժնի ծառայողների և Շիրակի մարզի պարեկների ձեռնարկած միջոցառումների արդյունքում պարզվել է վարորդի ինքնությունը։ Նշված ավտոմեքենան Գորկու փողոցում հայտնաբերվել և տեղափոխվել է ՊԾ հատուկ պահպանվող տարածք:
Գյումրի քաղաքի բնակիչ 30-ամյա և 28-ամյա երկու երիտասարդները Ռուսթավելու փողոցում հայտնաբերվել, ձերբակալվել և տեղափոխվել են Կումայրիի բաժին։
30-ամյա երիտասարդի անձնական խուզարկությամբ հայտնաբերվել է ատրճանակ և փամփշտատուփ։ Նա խոստովանել է, որ հայհոյել և ատրճանակ է պահել աղջիկների ուղղությամբ:
Երիտասարդները և կազմված փաստաթղթերը ներկայացվել են նախաքննական մարմին։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
