Վերապատրաստման դասընթացներն ամրապնդում են խոշտանգումների կանխարգելման և մարդու իրավունքների պաշտպանության ոլորտում ծառայողների մասնագիտական կարողությունները
ՆԳՆ ոստիկանության ձերբակալվածների պահման վայրերի և ուղեկցող ստորաբաժանումների անձնակազմի 60 տոկոսն արդեն վերապատրաստվել է «Խոշտանգումների և վատ վերաբերմունքի այլ ձևերի արգելքը» դասընթացի շրջանակում։
ՆԳՆ Մարդկային ռեսուրսների կառավարման վարչության մարդկային ռեսուրսների կարողությունների զարգացման և բարեվարքության հարցերով բաժնի բարեվարքության հարցերով կազմակերպիչ Անահիտ Կարապետյանի խոսքով՝ «Դասընթացն ունի հարուստ բովանդակային մաս, ինչը ծառայողների գործառույթային պարտականությունների իրականացման համար անհրաժեշտ գիտելիքների ձեռքբերման հնարավորություն է»:
ՆԳՆ կրթահամալիրի և ՄԻՊ գրասենյակի բանախոսները ներկայացրել են ՄԱԿ-ի Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի ու պատժի դեմ կոնվենցիայի և Ստամբուլի արձանագրության հիմնադրույթներն ու ոլորտի իրավակիրառ պրակտիկան։ Հաշվի առնելով թեմայի զգայունությունը՝ մշակվել է դասընթացի որակը գնահատելու հատուկ մեթոդաբանություն։
«Դասընթացի որակի գնահատման չափանիշները կազմված են 3 բաղադրիչներից՝ պարզել ծառայողների գիտելիքներն ու հմտությունները, գնահատել վերապատրասման դասընթացի որակը և արձանագրել հետադարձ կապը»,-նշել է ՆԳՆ կրթահամալիրի ուսումնական ստորաբաժանման ընդհանուր իրավաբանական առարկաների ամբիոնի պետ Ամալյա Սաֆարյանը:
Դասընթացի սկզբում հարցման միջոցով գնահատվել է թեմայի վերաբերյալ վերապատրաստվողների իմացությունը, իսկ ավարտին՝ ներկայացված նյութի յուրացման աստիճանը։ Ըստ Անահիտ Կարապետյանի՝ «Վերլուծությունը թույլ կտա գնահատել և՛ մատուցվող ծառայության որակը, և՛ ընկալման աստիճանը, գուցե նաև այն բացերը, որոնք հնարավոր է արձանագրել հետագայում»:
ՆԳ նախարարությունը կարևորում է ծառայողների շարունակական վերապատրաստումները, որոնց նպատակը մասնագիտական գիտելիքներն ու հմտությունները կատարելագործելն է։
