Վաղարշապատի ոստիկանները թարմ հետքերով բացահայտել են մեքենաներից կատարված գողության դեպքեր

Մարտի 12-ից 13-ը Արմավիրի մարզի Արագած, Գեղակերտ, Աղավնատուն և Խորունք գյուղերում «ՎԱԶ-2106» և «ՎԱԶ-2107» մակնիշի 7 մեքենաներից գողություններ էին կատարվել: Երկու դեպքում` տեխնիկական միջոցների գործադրմամբ, մյուս դեպքերում` օգտվելով մեքենաների դռները բաց լինելու հանգամանքից` ձայնարկիչ ու մարտկոցներ էին հափշտակել:
Ոստիկանության Վաղարշապատի բաժնի ծառայողները գողությունների վերաբերյալ հաղորդումները ստանալուն պես անհետաձգելի միջոցառումներ ձեռնարկեցին: Ուսումնասիրեցին մեքենաները, զրուցեցին ինչպես տուժողների, այնպես էլ համագյուղացիներ հետ, և վերջին հաղորդումից ժամեր անց կասկածյալը հայտնաբերվեց:
Քրեական հետախույզները տեղեկություններ ստացան, որ գողությունները հնարավոր է կատարած լինի Էջմիածնի 17-ամյա մի բնակիչ:
Մարտի 13-ին, ժամը 21-ի սահմաններում, նա բերման ենթարկվեց ոստիկանության Վաղարշապատի բաժին:
Հետագա միջոցառումներով պարզվել է, որ 17-ամյա երիտասարդը վարչական տարածքում կատարել է նաև այլ գողություններ և գողության փորձեր:
Հանգամանքները պարզվում են:
Միջոցառումներ են ձեռնարկվում` գողոնը հայտնաբերելու ուղղությամբ:
Փաստի առթիվ նախապատրաստվում են նյութեր: