Ոստիկանության շախմատի առաջնություն՝ «Դինամո» մարզահամալիրում

Համաձայն ոստիկանության մարզական միջոցառումների 2020 թվականի օրացուցային պլանի` փետրվարի 19-ից 21-ը «Դինամո» մարզահամալիրում անցկացվեց ոստիկանության արագ շախմատի առաջնություն:
Արդեն ավանդական դարձած մրցաշարը կազմակերպվել էր ՀՀ ոստիկանության, Երևանի շախմատի ֆեդերացիայի և «Դինամո» մարզական-հասարակական կազմակերպության նախաձեռնությամբ:
Մասնակցում էին ՀՀ ոստիկանության 17 ստորաբաժանումների և Արցախի ոստիկանության հավաքական թիմերը:
Եզրափակիչ մրցաշարն է` հաղթողի կոչումը նվաճելու համար սեղանների մոտ անզիջում պայքար:
Առաջնության ավարտից հետո, մինչ արդյունքները հայտարարելը, հաղթողներին շնորհավորանքի խոսք հղեցին ոստիկանության պետի տեղակալ Վարդան Մովսիսյանը և Երևանի շախմատի ֆեդերացիայի նախագահ, Ազգային ժողովի պատգամավոր Մխիթար Հայրապետյանը: Վարդան Մովսիսյանը նորանոր հաջողություններ մաղթեց մասնակիցներին: Մխիթար Հայրապետյանն էլ իր ելույթում, շնորհակալություն հայտնելով ոստիկանությանը մրցաշարը նախաձեռնելու համար, ընդգծեց, որ նման միջոցառումները նպաստում են շախմատի մասսայականությանը, ապա ամփոփվեցին արդյունքները:
Թիմային հաշվարկում հաղթողի կոչումը նվաճեց ոստիկանության Երևան քաղաքի վարչության հավաքական թիմը: 2-րդ և 3-րդ տեղերը գրավեցին կրթահամալիրի և ոստիկանության զորքերի հավաքականները:
Անհատական պայքարում 3-րդ տեղը զբաղեցրեց ոստիկանության Երևան քաղաքի վարչությունից՝ Արմենակ Գևորգյանը, 2-րդ տեղում՝ ոստիկանության զորքերից՝ Գրիգոր Մանուկյանը, իսկ 1-ին տեղը զբաղեցրեց, դարձյալ ոստիկանության զորքերից, Արմեն Հարությունյանը:
Առաջնության հաղթողներն ու մրցանակակիրներն արժանացան դիպլոմների, ստացան ժամացույցներ ու դրամական պարգևներ:
Պարգևատրումը կատարեցին Վարդան Մովսիսյանը և Մխիթար Հայրապետյանը:
Միջոցառման ավարտին ոստիկանության պետի տեղակալը, ևս մեկ անգամ շնորհավորելով հաղթողներին, մաղթեց բարի և անփորձանք ծառայություն: