«Օրինապահ հետիոտն» խորագրով հանդիպում զրույցներ Արագածոտնի մարզի դպրոցներում
Սեպտեմբերի 1-ից հանրապետության դպրոցներում մեկնարկած «Օրինապահ հետիոտն» խորագրով հանդիպում-զրույցներն այս անգամ անցկացվել են Արագածոտնի մարզի դպրոցներում։
Մարզի համայնքային ոստիկաններն ու Պարեկային ծառայողները համատեղ այցելել են տարբեր բնակավայրերի հիմնական և ավագ դպրոցներ։
Հարցուպատասխանի ձևաչափով աշակերտները ոստիկանների հետ քննարկել են ճանապարհային երթևեկության կանոնները, միաժամանակ ընդգծվել է դրանց պահպանման անհրաժեշտությունը։
Ոստիկանները զրույցների ընթացքում նշել են, որ օրինապահ լինելու մշակույթը ձևավորում է յուրաքանչյուր անձի վարքագծից, ինչը հենց իրավագիտակից հասարակություն ունենալու գրավականն է։
Հանդիպում-զրույցները նախատեսվածից երկար են տևել: Աշակերտների տարաբնույթ հարցերին տրվել են սպառիչ պատասխաններ։
Նմանօրինակ հանդիպումները հանրապետության բոլոր մարզերում կշարունակվեն մինչև հոկտեմբերի 1-ը։
