«Mamul.am» լրատվական կայքէջում հրապարակված հոդվածի հետքերով

Նոյեմբերի 23-ին «Mamul.am» լրատվական կայքէջում հրապարակվել էր «Արգիշտի Քյարամյանն անձնագրային ծառայությունների ղեկավարների միջոցով 1400 հայկական անձնագիր է բաժանել հայերեն իմացող ազերիներին» վերտառությամբ հոդված, ըստ որի՝ «Ազգային անվտանգություն» կուսակցության նախագահ Գառնիկ Իսագուլյանը «Հայելի» մամուլի ակումբում հրավիրված ասուլիսի ժամանակ հայտնել է, որ պատերազմի ժամանակ 400 հոգի Նախիջևանից Քաջարանով անցել են Արցախ ու գնացել մինչև Հադրութի թիկունք, և դա ապահովել է ՀՀ ազգային անվտանգության ծառայության նախկին տնօրեն Արգիշտի Քյարամյանը:
Վերոհիշյալ հանգամանքների պարզաբանման համար ոստիկանության ներքին անվտանգության վարչությունում իրականացված ծառայողական քննության արդյունքներով՝ ՀՀ ԱԱԾ նախկին տնօրենի միջնորդությամբ անձնագրային բաժանմունքի պետեր նշանակելու և նրանց կողմից ազգությամբ ադրբեջանցիների հայկական անձնագրեր բաժանելու հանգամանքներ չեն հաստատվել: Դրանք հերքվել են նաև ՀՀ հատուկ քննչական ծառայությունում նախապատրաստված և հանցագործության դեպքի բացակայության հիմքով քրեական գործի հարուցումը մերժված նյութերով:
Ծառայողական քննության արդյունքները թողնվել են անհետևանք: