Կողոպուտ Էրեբունի վարչական շրջանի Այվազովսկու փողոցում․ ոստիկանները հայտնաբերել են կասկածյալներին

Ապրիլի 8-ին Էրեբունի վարչական տարածքում կողոպուտ էր կատարվել: Ժամը 1-ի սահմաններում երկու երիտասարդ տեխնիկական միջոցների գործադրմամբ բացել էին Այվազովսկու փողոցում տեղադրված սրճեփ սարքի դուռը: Հարևանությամբ գործող ավտոլվացման կետի պահակը նկատել էր նրանց: Փորձել էր կանխել: Երիտասարդներից մեկը սրճեփ սարքի մետաղադրամների դատարկ արկղով խփել էր նրա գլխին, բացահայտ հափշտակել էին մետաղադրամներով լի մյուս արկղը և դիմել փախուստի:
Դեպքից րոպեներ անց ոստիկանության Էրեբունու բաժնում օպերատիվ կառավարման կենտրոնից ահազանգ ստացվեց: Հերթապահ խումբը մեկնեց Այվազովսկու փողոց:
Իրավապահներն ուսումնասիրեցին դեպքի վայրը, զրուցեցին պահակի հետ: Տուժողը մոտավոր նկարագրեց, թե կասկածյալներն ինչ տարիքի են, ինչ կազմվածքի: Սակայն երիտասարդների արտաքին նկարագիրը պարզելը բացահայտման համար քիչ էր, անհրաժեշտ էր ճշտել անձնական տվյալները, գտնվելու վայրը և, որ ամենակարևորն էր, հայտնաբերել նրանց:
Որոնողական աշխատանքները շարունակվեցին: Անհայտ անձանց ինքնությունը պարզելու, նրանց և գողոնը հայտնաբերելու ուղղությամբ քրեական հետախույզները ծավալուն միջոցառումներ ձեռնարկեցին: Կողմնորոշումներ ուղարկվեցին ոստիկանության մյուս ստորաբաժանումներ: Եվ հետևողական աշխատանքի շնորհիվ դեպքից օրեր անց կասկածյալները հայտնաբերվեցին:
Էրեբունու բաժնի քրեական հետախույզները, համագործակցելով ոստիկանության Երևան քաղաքի վարչության և Կենտրոնական բաժնի ծառայողների հետ, տեղեկություններ ստացան, որ կողոպուտը հնարավոր է կատարած լինեն Իսակովի պողոտայի 24 և 25-ամյա երկու երիտասարդ:
Ապրիլի 13-ին իրավապահները երկուսին էլ բերման ենթարկեցին ոստիկանության Էրեբունու բաժին:
Փաստի առթիվ հարուցվել է քրեական գործ:
Հանգամանքները պարզվում են:
Հարուցված քրեական գործի նախաքննությունը շարունակվում է: