Գողություն «Հայփոստի» Ջերմուկի բաժանմունքից. տեղի ոստիկանների բացահայտումը

Ապրիլի 21-ին 1-02 զանգած կինը հայտնում էր, որ նախորդ օրը «Հայփոստի» Ջերմուկի բաժանմունքից գողություն է եղել։
Բաժնից դեպքի վայր մեկնած օպերատիվ խմբին ավագ օպերատորը հաղորդում տվեց, որ զինծառայության ապահովման հիմնադրամի հանգանակության արկղից փող են գողացել։ Նա հավելեց նաև, որ մոտ 10 օր առաջ իր սեղանի դարակից էլ անհետացել էր 28 հազար դրամ, ինչի կապակցությամբ, սակայն, իրավապահներին չէր դիմել։
Ջերմուկի ոստիկանները մանրակրկիտ ուսումնասիրեցին տարածքը. ոչինչ վնասված չէր, անգամ մուտքի դռան կողպեքը։ Մնում էր ենթադրել, որ դուռը բացել են հարմարեցված բանալիով, այն էլ՝ երկու անգամ։
Ձեռնարկվեցին օպերատիվ-հետախուզական միջոցառումներ, որոնց արդյունքում բաժնի անչափահասների գործերով և ընտանիքում բռնության կանխարգելման խմբի ծառայողները ստացան տեղեկություն, որ հափշտակությունները կատարել է 17-ամյա մի պատանի։ Ահազանգի հաջորդ օրը նա ներկայացվեց ոստիկանության Ջերմուկի բաժին և խոստովանեց կատարած երկու գողությունը։ Պարզվեց նաև, որ բանալին ոչ թե հարմարեցված էր, այլ, ավելի ճիշտ՝ համընկած. զարմանալի զուգադիպությամբ տղայի տան բանալին բացել էր նաև «Հայփոստի» բաժանմունքի դուռը։
Անչափահասը հանձնվել է ծնողների հսկողությանը։ Դեպքի հանգամանքները պարզվում են։