Ավանի համայնքային ոստիկանները բացահայտեցին Ծարավ Աղբյուրի փողոցում մեքենաներից կատարված գողությունները
Ավտոմեքենաներից գողությունների վերաբերյալ առաջին հաղորդումները Համայնքային ոստիկանության Ավանի բաժնում ստացվեցին հոկտեմբերի 10-ին: Գողացել էին մայրաքաղաքի Ծարավ Աղբյուրի փողոցում կայանված «Լեքսուս» և «Շևրոլե» մակնիշի ավտոմեքենաների կողային հայելիների ապակիները։
Մինչ համայնքային ոստիկանները ձեռնարկում էին դեպքերը բացահայտելուն ուղղված օպերատիվ-հետախուզական միջոցառումներ` հոկտեմբերի 15-ին և 20-ին ստացվեցին նոր հաղորդումներ` նույն տեղից կատարված նմանատիպ մեկական գողությունների վերաբերյալ:
Ավան և Նոր Նորք վարչական շրջանների քննչական բաժնում նախաձեռնված քրեական վարույթի շրջանակում միջոցառումները շարունակվեցին և դրական արդյունքի հասան հոկտեմբերի 29-ին։
Ավան-Առինջի բնակիչ 33-ամյա տղամարդն իր տանը հայտնաբերվեց և հիշյալ գողութունները կատարելու կասկածանքով ձերբակալվեց:
Նույն օրը կատարված քննչական փորձարարության ժամանակ Ծարավ Աղբյուրի փողոցի հարակից տարածքներից նա ներկայացրեց գողոնի մի մասը:
Դատարանի որոշմամբ 33-ամյա տղամարդու նկատմամբ խափանման միջոց է կիրառվել տնային կալանքը:
Ձեռնարկվում են միջոցառումներ գողոնի մյուս մասը հայտնաբերելու ուղղությամբ։
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
