Ախուրյանի համայնքային ոստիկանները թմրամիջոցի իրացման դեպք են բացահայտել. նախաձեռնվել է քրեական վարույթ
Համայնքային ոստիկանության Ախուրյանի բաժնի ծառայողները ձեռնարկած օպերատիվ-հետախուզական միջոցառումների արդյունքում փետրվարի 13-ին Ազատան բնակավայրի վարչական տարածքում գտնվող ռեստորանային համալիրի մոտ հայտնաբերել, թմրամիջոց իրացնելու կասկածանքով ձերբակալել և «Մերսեդես» մակնիշի մեքենայով հանդերձ՝ բաժին են տեղափոխել Հրազդան քաղաքի բնակիչ 27-ամյա մի երիտասարդի: Նրա անձնական խուզարկությամբ հայտնաբերվել է մարիխուանա տեսակի թմրամիջոցի նմանվող զանգվածով 6 փաթեթ՝ ընդհանուր 21,13 գրամ քաշով:
Երիտասարդը կազմված փաստաթղթերի հետ ներկայացվել է նախաքննական մարմին, իսկ «Մերսեդեսը»՝ տեղափոխվել է բաժնի պահպանվող հատուկ տարածք:
Նախաձեռնված քրեական վարույթի շրջանակում կատարված զննությամբ մեքենայում հայտնաբերվել է մարիխուանա տեսակի թմրամիջոցի նմանվող զանգվածով 24 փաթեթ՝ ընդհանուր 84,82 գրամ քաշով:
Կատարվում է նախաքննություն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
