Էջմիածին քաղաքի 63-ամյա բնակիչը ապօրինի ձեռնարկատիրությամբ էր զբաղվում. համայնքային ոստիկանների բացահայտումը
Համայնքային ոստիկանության Վաղարշապատի բաժնի ծառայողները փետրվարի 28-ին օպերատիվ տեղեկություններ էին ստացել, որ Էջմիածին քաղաքի 63-ամյա բնակիչը Սոս Մանուկյան և Ալավերդյան փողոցների երկու հասցեներում, առանց համապատասխան թույլտվության և լիցենզավորման, զբաղվում է տրանսպորտային միջոցների շարժիչի յուղերի և դիզվառելիքի վաճառքով:
Տեղեկությունները ստուգելու նպատակով համայնքային ոստիկաններն այցելել են նշված հասցեներ: Սոս Մանուկյան փողոցում գտնվող ավտոտնակի և բակի ակնհայտ տեսանելի հատվածներում կային 800 լիտրից ավելի շարժիչի յուղով պլաստմասե տարաներ և վաճառքի համար նախատեսված սարքավորումներ, իսկ Ալավերդյան փողոցի ավտոտնակում գտնվող տարաների մեջ՝ 2600 լիտրից ավելի տրասպորտային միջոցների շարժիչի յուղ, 130 լիտր դիզվառելիք և դրանց վաճառքի համար նախատեսված սարքավորումներ:
Կազմված փաստաթղթերը փոխանցվել են նախաքննական մարմին:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
