Հայտնաբերվել է մեթամֆետամինով 56 փաթեթ․ ՔՈԳՎ հերթական բացահայտումը
Քրեական ոստիկանության թմրամիջոցների անօրինական շրջանառության դեմ պայքարի վարչության ծառայողները ստացել էին օպերատիվ տեղեկություն, որ օտարերկրացի 29-ամյա մի տղամարդ «Տելեգրամ» հավելվածի միջոցով ապօրինի ձեռք բերում և իրացնում է թմրամիջոցներ։
Քրեական ոստիկանները փետրվարի 20-ին իրացրին տեղեկությունը։ Ժամը 11․55-ին Երևանի Թամանցիների փողոցին հարակից տարածքում նրանք ձերբակալեցին տղամարդուն և տեղափոխեցին Համայնքային ոստիկանության Շենգավիթի բաժին։
Նրա խուզարկությամբ հայտնաբերվեց սև ժապավենով 23 փաթեթ՝ ընդհանուր ավելի քան 56 գրամ քաշով։ Ըստ տղամարդու՝ փաթեթներում մեթամֆետամին էր, որը ձեռք էր բերել «Տելեգրամ» հավելվածի միջոցով՝ տարբեր վայրերում տեղադրելով իրացնելու նպատակով։
Նախաձեռնվեց քրեական վարույթ, որի շրջանակում կատարված քննչական գործողության արդյունքում տարբեր թաքստոցներում հայտնաբերվեց օտարերկրացու տեղադրած ևս 33 փաթեթ։ Հայտանբերվածի ընդհանուր քաշն ավելի քան 87 գրամ էր։
Տղամարդը կալանավորվել է։ Նախաքննությամբ հանգամանքները պարզվում են։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
