Ոստիկանները բացահայտեցին Ամասիայում տեղի ունեցած ավտոմեքենա փախցնելու դեպքը

Մարտի 3-ին, ժամը 11.55-ին, Ամասիա գյուղի մի բնակչից ոստիկանության Ամասիայի բաժնում հաղորդում է ստացվել, որ մարտի 2-ի ժամը 23.00-ից մինչև մարտի 3-ի ժամը 08.00-ն ընկած ժամանակահատվածում փախցրել են Ամասիա գյուղի 2 փողոցի ճամփեզրին կայանված իր «Օպել Վեկտրա» մակնիշի ավտոմեքենան, որի սրահում եղել է 20.000 դրամ՝ պատճառելով 1.460.000 դրամի վնաս:
Ոստիկանության ծառայողների ձեռնարկած օպերատիվ-հետախուզական միջոցառումների արդյունքում, նույն օրը, ժամը 17.30-ի սահմաններում ավտոմեքենան հայտնաբերվել է Շիրակի մարզի Գուսանագյուղ գյուղի մոտակայքում գտնվող նախկին պոմպակայանի մոտ՝ թալանված, բացակայում էին համարանիշերը, գազի բալոնը, ձայնարկիչը, 20.000 դրամը, կոտրված էր հետևի աջ ապակին:
Ձեռնարկված օպերատիվ-հետախուզական միջոցառումների շնորհիվ պարզվել է, որ մարտի 3-ին, ժամը 05.30-ի սահմաններում, հիշյալ ավտոմեքենան «Մերսեդես-609Դ» մակնիշի ավտոտարհանիչ ավտոմեքենայով առևանգել և Գուսանագյուղ տեղափոխելով՝ թալանել են 1996 թ. ծնված Դավիթ Մ.-ն և 1998 թ. ծնված Մկրտիչ Կ.-ն:
Կատարվում է քննություն:

***

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: