Տարվա ամփոփում ոստիկանության Երևան քաղաքի վարչությունում

Հունվարի 21-ին ոստիկանության Երևան քաղաքի վարչությունում տեղի ունեցավ 2019 թվականին կատարված աշխատանքների ամփոփում: Նիստը վարում էր վարչության պետ, ոստիկանության գնդապետ Գարիկ Ղուկասյանը։ Ներկա էին ոստիկանության Երևան քաղաքի վարչության և ենթակա ստորաբաժանումների ղեկավար կազմը։ Վարչության պետի տեղակալներ Ալքսանդր Մամիկոնյանը, Էդգար Պետրոսյանը, Գագիկ Չիբուխչյանն ու վարչության շտաբի պետ Անդրանիկ Իսկանդարյանը ներկայացրին անցած տարում կատարված օպերատիվ-ծառայողական աշխատանքները և կարդային քաղաքականության վերաբերյալ վերլուծություն։ Ներկայացվեցին գրանցված ու բացահայտված հանցագործությունների թվային տվյալներ։ Մանրամասն քննարկվեց կատարված աշխատանքը։ 2019 թվականին Երևանում արձանագրվել է վարույթներում գտնվող քրեական գործերով և նյութերով անցնող 16.252 հանցագործության դեպք: Գարիկ Ղուկասյանը բաժին առ բաժին վեր հանեց խնդիրներն ու թերությունները և դրանց շտկման ուղղությամբ տվեց կոնկրետ ցուցումներ ու հանձնարարականներ։ Նա շնորհակալություն հայտնեց 2019 թվականին կատարված ծանրաբեռնված աշխատանքի համար և հույս հայտնեց, որ մատնանշված թերությունները 2020 թվականին վերացված կլինեն։