Ոստիկանության վետերան Ռաֆայել Մեսրոպյանի գրքի շնորհանդեսը (ՏԵՍԱՆՅՈՒԹ)

Հունվարի 30-ին Մալաթիայի ոստիկանության վետերանների խորհրդի նախաձեռնությամբ` համայնքի վարչական շենքի դահլիճում տեղի ունեցավ ոստիկանության վետերան, բանաստեղծ, Արցախյան ազատամարտի մասնակից Ռաֆայել Մեսրոպյանի «Հերոսապատում» գրքի շնորհանդեսը: Միջոցառումը նվիրված էր Հայաստանի Հանրապետության և ոստիկանության 100-ամյակներին, ինչպես և հայոց բանակի 26-րդ տարեդարձին:
Շնորհանդեսին ներկա էին Արցախյան ազատամարտի մասնակից ոստիկանության վետերաններ, Երկրապահ կամավորականներ, ապրիլյան քառօրյա պատերազմի մասնակիցներ, ոստիկաններ, գրողներ, այլ հյուրեր:
Մալաթիայի վետերանների խորհրդի նախագահը ներկայացրեց ոստիկանության դերն Արցախյան ազատամարտում և մասնակցությունը հայոց բանակի կազմավորման գործին: Այնուհետև խոսեց Ռաֆայել Մեսրոպյանի անցած մարտական ուղու, ծառայության ընթացքում ունեցած ձեռքբերումների, գրական գործունեության մասին, ընդգծելով, որ նրա ստեղծագործությունների զգալի մասը նվիրված են հայրենիքին և նպաստում են երիտասարդների դաստաիարակությանը:
Սերո Խանզադյանի անվան դպրոցի սաները բեմականացրել էին Ռաֆայել Մեսրոպյանի «Սարդարապատ հերոսական բալլադ» պոեմը: Վահան Զատիկյանի անվան դպրոցի աշակերտները արտասանեցին նրա բանաստեղծություններից: Ելույթ ունեցավ «Տարոն» գեղագիտական կենտրոնի պարային համույթը:
Միջոցառման ավարտին Ռաֆայել Մեսրոպյանը շնորհակալություն հայտնեց շնորհանդեսի մասնակիցներին և գրքեր նվիրեց: