Մայիս՝ վճռորոշ հաղթանակների ամիս (ՏԵՍԱՆՅՈՒԹ)
Մայիսը վճռորոշ ճակատամարտերի ամիս է մեզ համար: Հաղթակա՛ն ճակատամարտերի:
1945-ի մայիսի 9-ը, 1992-ի մայիսի 9-ը. զուգադիպություն է գուցե, բայց՝ ոչ պատահականություն: Պատահական հաղթանակներ չեն լինում:
1945-ի մայիսի 9-ը մեծագույն իրադարձություն էր ինչպես աշխարհի ժողովուրդների, այնպես էլ հայ ժողովրդի կյանքում: Հարյուր հազարավոր հայորդիներ ֆաշիզմի դեմ պայքարում իրենց հերոսական մասնակցությամբ մոտեցրին Հաղթանակի եւ խաղաղության օրը:
Պատերազմի առաջին իսկ օրերից Հայաստանից ռազմաճակատ մեկնեցին միլիցիայի հարյուրավոր աշխատակիցներ: Միլիցիան հսկայածավալ աշխատանք կատարեց նաեւ թիկունքում՝ մոտեցնելով հաղթանակը:
Տասնամյակներ անց հայրերի եւ պապերի սխրանքի արժանավոր ժառանգները Շուշիի ազատագրումով մայիսի 9-ին հաղորդեցին նոր խորհուրդ:
Այս տոնը մեզ համար, թերեւս, ամենաթանկն է, որովհետեւ ձեռք բերվեց բազմաթիվ հայորդիների ինքնազոհության ու հերոսացման գնով, որովհետեւ Շուշիի ազատագրումով մեր հետագա ռազմական հաջողությունների սկիզբը դրվեց:
Ծառայողական պարտականություններին զուգահեռ՝ Հայաստանի միլիցիայի աշխատակիցները դարձել էին երկրի սահմաններն ու Արցախը պահող զինվորներ: Կանգնելով ազատամարտիկների կողքին՝ Արցախյան հերոսամարտում սխրանքներ գործած մեր գործընկերները փառավոր էջերով հարստացրին հայկական ոստիկանության պատմությունը:
Մայիսի 9-ը սրբազան ու պարտավորեցնող տոն է, սերունդների պատմական հաղթանակների միասնական տոն: Գլուխ խոնարհելով մեր հաղթանակների ճանապարհին հերոսաբար ընկածների անմար հիշատակի առաջ՝ պարտավոր ենք իրականություն դարձնել նրանց երազանքը, մեր ժողովրդի դարավոր երազանքը՝ անառիկ հայրենիք, ապահով երկիր, բարեկեցիկ ժողովուրդ:
