Ավարտվեց «Երկխոսության ոստիկանություն» թեմայով երկշաբաթյա վերապատրաստման դասընթացը

Մայիսի 12-ին ամփոփվեց «Երկխոսության ոստիկանություն» թեմայով երկշաբաթյա վերապատրաստման դասընթացը: ԵԱՀԿ քարտուղարության աջակցությամբ կազմակերպված դասընթացին մասնակցեցին ոստիկանության տարբեր ստորաբաժանումների ծառայողներ: Դասընթացի ընթացքում ոստիկանության ներկայացուցիչները ծանոթացան քաղաքացիների հետ երկխոսելու շվեդական փորձին, մասնավորապես՝ դրանք արդյունավետ կիրառելու տեխնիկային, մեթոդներին ու պրակտիկ իրավիճակների լուծումներին:
Ամփոփմանը ներկա էին ոստիկանության շտաբի պետ, ոստիկանության գնդապետ Արմեն Մկրտչյանը, կրթահամալիրի պետ, ոստիկանության գնդապետ Մանուկ Մուրադյանը, շտաբի միջազգային համագործակցության վարչության պետի տեղակալ, ոստիկանության գնդապետ Արմեն Սեդրակյանը, ՀՀ-ում Շվեդիայի Թագավորության դեսպանության փոխդեսպան, խորհրդական Անիկա Նորդինը, ԵԱՀԿ ծրագրերի ազգային համակարգող Ռուզաննա Բաղդասարյանը և փորձագետ-դասընթացավարներ Կարլ Յոհան Ահլստրոմն ու Տանյա Վիկլունդը:
ՀՀ ոստիկանության շտաբի պետ, ոստիկանության գնդապետ Արմեն Մկրտչյանը շնորհակալություն հայտնեց դասընթացի կազմակերպիչներին և մասնակիցներին՝ նշելով, որ միջոցառումը կարևոր նշանակություն ունի ոստիկանության համար, քանի որ օգնում է մասնագիտական գործառույթներն իրականացնել ավելի մեծ արդյունավետությամբ:
ՀՀ-ում Շվեդիայի Թագավորության դեսպանության փոխդեսպան, խորհրդական Անիկա Նորդինը, շնորհավորելով դասընթացի կազմակերպիչներին ու մասնակիցներին արդյունավետ աշխատանքի համար, ոստիկանության հետ համագործակցությունը շարունակելու պատրաստակամություն հայտնեց: Դասընթացավար Կարլ Յոհան Ահլստրոմն էլ ընդգծեց, որ քննարկումները բավական հետաքրքիր էին և արդյունավետ: Նա նաև շնորհակալություն հայտնեց ՀՀ ոստիկանությանն ու կրթահամալիրին՝ դասընթացը բարձրորակ կազմակերպելու համար: Շնորհակալական խոսքով հանդես եկավ նաև ԵԱՀԿ ծրագրերի ազգային համակարգող Ռուզաննա Բաղդասարյանը:
Հանդիպման ավարտին դասընթացի մասնակիցները ստացան հավաստագրեր: