Արմավիրի մարզային վարչության քրեական հետախույզներն ապօրինի թմրանյութ պահելու և կանեփ աճեցնելու դեպքեր են բացահայտել

Հոկտեմբերի 17-ին ոստիկանության Արմավիրի մարզային վարչության քրեական հետախույզները օպերատիվ տեղեկություններ էին ստացել, որ Գայ գյուղի 61-ամյա մի բնակիչ տնամերձ հողամասում և կից շինություններում կանեփ է աճեցնում և թմրանյութ պահում: Իրավապահները մեկնեցին նշված հասցե: Նրանք ակնհայտ տեսանելի վայրում նկատեցին կանեփի չորացված բույսեր: Տղամարդը հայտնել է, որ նաև տանն ունի կանեփից պատրաստված չոր զանգված:
Դեպքի առթիվ նախաձեռնվել է քրեական վարույթ, որի շրջանակում զննություն է կատարվել նշված հասցեում: Հայտնաբերվել է երկու փաթեթ՝ 50 գրամից ավելի կանեփանման չորացված, մանրացված զանգվածով: Տղամարդը իրավապահներին է ներկայացրել 4,61 գրամ մարիխուանայի նմանվող զանգված և հայտնել, որ այն թմրանյութ է:
Ապօրինի թմրանյութ պահելու և կանեփ աճեցնելու մասին հաջորդ տեղեկությունը ստացվեց հոկտեմբերի 20-ին: Իրավապահները մեկնեցին Այգեշատ գյուղի 53-ամյա բնակչի տուն: Տանտերը ոստիկաններին ներկայացրեց ապակե տարայով մարիխուանայի նմանվող զանգված: Դեպքի առթիվ նախաձեռնվեց քրեական վարույթ, որի շրջանակում կատարվեց նշված հասցեի զննություն: Տղամարդը իրավապահներին ներկայացրեց մարիխուանայի նմանվող զանգվածով թափանցիկ տարա՝ 11,56 գրամ քաշով, և թղթե մեկ փաթեթ՝ 0,85 գրամ քաշով:
53-ամյա տղամարդը հայտնել է, որ ներկայացվածը թմրանյութ է, կանեփն էլ ինքն է աճեցրել:
Կազմված փաստաթղթերն ուղարկվել են Վաղարշապատի քննչական բաժին:
Նախաքննությամբ հանգամանքները պարզվում են: