Արմավիրի բաժնի ոստիկանների պայքարը ապօրինի թմրաշրջանառության դեմ

Արմավիրի բաժնի համայնքային ոստիկանները Նալբանդյան գյուղում նոյեմբերի 14-ին ձերբակալել և բաժին են տեղափոխել նույն գյուղի 45-ամյա մի բնակչի։ Անձնական խուզարկությամբ նրա մոտ հայտնաբերվել են թղթե 2 փաթեթ և 3 գլանակ, որոնցից մեկը՝ ինքնաշեն։ Փաթեթները լցված էին ընդհանուր 3,82 գրամ դեղնականաչավուն զանգվածով, իսկ ածխացած հետքերով գլանակների քաշը 15 գրամից ավելի էր։
Տղամարդը հայտնել է, որ հայտնաբերվածը կանեփից պատրաստաված թմրամիջոց է, պատրաստել է վայրաճ բույսերից՝ անձնական օգտագործման համար։
Արմավիրի մարզային վարչության քրեական հետախույզներն էլ հաջորդ օրը՝ նոյեմբերի 15-ին, օպերատիվ տեղեկություն ստացան 55-ամյա մի ալաշկերտցու վերաբերյալ։ Ըստ տեղեկության՝ նա աճեցնում էր կանեփ, նաև պահում կանեփից պատրաստված թմրամիջոց։
Նախաձեռնված քրեական վարույթի շրջանակում Արմավիրի մարզային վարչության և Արմավիրի բաժնի ծառայողները Ալաշկերտում էին։ Հայտնաբերվեց ապակյա 2 լիտր տարողությամբ տարա՝ լցված կանեփանման զանգվածով։ 55-ամյա տղամարդը հայտնեց, որ հայտնաբերվածը պատրաստել է իր աճեցրած կանեփից՝ անձնական օգտագործման համար։
Նշանակվել են փորձաքննություններ։
Դեպքերի հանգամանքները պարզվում են։
Ոստիկանության հակաթմրամոլային պայքարը շարունակվում է։