Գլխավոր էջ
ԿԱՌՈՒՑՎԱԾՔ
Հայաստանի Դինամո մարզական հասարակական կազմակերպություն
Ամփոփ տեղեկություններ

Ամփոփ տեղեկություններ

Համառոտակի՝ «Դինամո» մարզական հասարակական կազմակերպության անցած ուղու մասին

Հայաստանի «Դինամո» մարզական հասարակական կազմակերպությունը հիմնադրվել է 1925 թ. դեկտեմբերին, մի խումբ իրավապահ աշխատակիցների ջանքերով:

Հիմնադրման օրից անցել է շուրջ 87 տարի, և այսօր էլ «Դինամո» մարզական հասարակական կազմակերպությունը ՀՀ կառավարության և ոստիկանության կողմից ցուցաբերվող նյութական ու բարոյական աջակցության շնորհիվ զարգանում է:

Հայաստանի «Դինամո» մարզահամալիրի ֆիզկուլտուրայի տունը՝ բռնցքամարտի և ըմբշամարտի մարզադահլիճներով, շահագործվում է 1965 թվականից, իսկ «Դինամո» խաղադահլիճը՝ 1977 թ.-ից: Մարզահամալիրի մասնագիտացված մարզադահլիճներն իրենց շահագործման օրվանից առայսօր, ավելի քան 47 տարի չէին նորոգվել, ինչը հաստատում են մարզիչները: Մարզահամալիրը մասնակիորեն հիմնանորոգվել էր միայն 1999 թ.-ին, առաջին համահայկական խաղերի անցկացման առիթով:

2011 թվականի դեկտեմբերի 28-ից ՀՀ ոստիկանության պետ Վլադիմիր Գասպարյանի բարձր հովանու ներքո և Հայաստանի «Դինամո» մարզական հասարակական կազմակերպության նախագահի առաջին տեղակալ Գառնիկ Հայրապետյանի նախաձեռնությամբ, «Դինամո» ՄՀԿ-ում՝ «Վերածնունդ» կարգախոսով, սկսվեցին «Դինամո» ՄՀԿ մասնագիտացված մարզադահլիճի հիմնանորոգման և վերակառուցման աշխատանքները: Այդ գաղափարի շուրջը միացան նաև «Դինամո» ՄՀԿ խորհրդի մի շարք անդամներ, և այսօր մենք ականատեսն ենք այն մարզօջախի վերականգնմանն ու վերածնմանը, որտեղ ներկայումս հաճախում է շուրջ 700 երեխա, որտեղ իրենց մարտական և ֆիզիկական պատրաստականությունն են բարձրացնում 400-ից 500 ոստիկան, որտեղ մարզվել և մարզական բարձունքների են հասել այնպիսի անվանի մարզիկներ, ինչպիսիք են օլիմպիական չեմպիոններ Իգոր Նովիկովը` ժամանակակից հնգամարտ, Օգսեն Միրզոյանը` ծանրամարտ և Հրաչյա Պետիկյանը` հրաձգություն: Յոթ դինամոյականներ նվաճել են արծաթե և բրոնզե մեդալներ, այդ թվում Աշոտ Կարագյանը` սուսերամարտ, Սիրվարդ Էմիրզյանը և Դավիթ Համբարձումյանը` ջրացատկ, Ալֆրեդ Տեր-Մկրտչյանը` հունա-հռոմեական ըմբշամարտ, Արսեն Մելիքյանը` ծանրամարտ: 2008 թվականին Պեկինում կայացած վերջին Օլիմպիական խաղերում ՀՀ 6 բրոնզե մեդալներից 2-ը նվաճել են դինամոյականներ. Ռոման Ամոյանը` հունա-հռոմեական ոճի ըմբշամարտ և Տիգրան Մարտիրոսյանը` ծանրամարտ (ք. Գյումրի): Դինամոյականներ են ԽՍՀՄ աշխարհի և Եվրոպայի առաջնությունների հաղթողներ և մրցանակակիրներ Նորայր Մուշեղյանը և Արշակ Սանոյանը` ազատ ոճի ըմբշամարտ, Բենուր Փաշայանը և շատ այլ մարզիկներ, որոնց անունները և նվաճած տեղերը թվարկելու համար պահանջվում է բավականին ժամանակ:

Կասկած չկա, որ վերականգնված մարզօջախը ամուր հիմք է դառնալու մատաղ սերնդի հետագա առողջ դաստիարակության համար՝ իր հերթին ամուր կապ հանդիսանալով հասարակության, ոստիկանության և զինված ուժերի միջև:

Ամփոփ տեղեկություններ

ՀԻՄՆԱԿԱՆ