Լորուտում հրազենի գործադրմամբ կատարված հանցագործությունը բացահայտվել է

Մարտի 20-ին, ժամը 23.15-ին, ոստիկանության Թումանյանի բաժնում Տարոնի բաժնից հեռախոսագիր էր ստացվել, որ հրազենային վնասվածքով «Վանաձոր» բժշկական կենտրոն է տեղափոխվել 24-ամյա Էդգար Մելիքսեթյանը, որը բնակվում է Լորուտ գյուղում: Ոստիկանության և քննչական կոմիտեի Լոռու մարզի ստորաբաժանումների համատեղ ձեռնարկած օպերատիվ-հետախուզական միջոցառումների և քննչական գործողությունների արդյունքում պարզվել է, որ մարտի 20-ին Լորուտ գյուղի տներից մեկում Էդգար Մելիքսեթյանն ու 18-ամյա համագյուղացին վիճել էին։ Այդ մասին 18-ամյա երիտասարդը հայտնել էր հորը, նա էլ վրեժխնդիր լինելու նպատակով գյուղամիջում հրազենից կրակել էր 24-ամյա երիտասարդի որովայնին: Տուժողը վիրահատվել էր։
Մարտի 21-ին, ժամը 12.30-ին, հիվանդանոցից նոր հաղորդում ստացվեց. Էդգար Մելիքսեթյանը մահացել է:
Հարուցված քրեական գործի շրջանակներում ձեռնարկված օպերատիվ-հետախուզական և այլ միջոցառումների արդյունքում ոստիկանության Լոռու մարզային վարչության ու Թումանյանի բաժնի ծառայողները հորն ու որդուն Լորուտից բերման են ենթարկել Թումանյանի բաժին, որտեղ 42-ամյա տղամարդը խոստովանել է հանցանքը և ներկայացրել հանցագործության գործիքը՝ իր անվամբ հաշվառված 5,45 մմ տրամաչափի ակոսափող հրացանը: Նա ոստիկանությունից ներկայացվել է վարույթն իրականացնող մարմնին ու ձերբակալվել։
Նախաքննությունը շարունակվում է: