Թմրամոլության դեմ Աշտարակի քրեական հետախույզների պայքարի երկու դրվագ

Թմրամիջոց ապօրինի ձեռք բերելու, պահելու և օգտագործելու վերաբերյալ հերթական տեղեկությունն Աշտարակի քրեական հետախույզներն իրացրին նոյեմբերի 21-ին: Ժամը 11-ին Աշտարակ քաղաքի Խորենացու փողոցում նրանք ձերբակալեցին և բաժին տեղափոխեցին 23-ամյա մի երիտասարդի:
Անձնական խուզարկությամբ նրա մոտ հայտնաբերվեցին ավելի քան 15 գրամ կանեփանման զանգվածով թղթե փաթեթ ու մոխրացած հետքերով կաթուցիչ:
Երիտասարդն ու կազմված փաստաթղթերը ներկայացվեցին Արագածոտնի մարզային քննչական վարչություն, որտեղ նախաձեռնվեց քրեական վարույթ:
Հետագա միջոցառումներով ստացվեց նոր տեղեկություն. նրան թմրամիջոցը տվել էր մեկ այլ աշտարակցի: 35-ամյա տղամարդը նույնպես ձերբակալվեց ու ներկայացվեց նախաքննական մարմին:
Նույնաբովանդակ մի օպերատիվ տեղեկություն էլ Աշտարակի քրեական հետախույզներն իրացրին նոյեմբերի 26-ի առավոտյան: Աշտարակի Տիգրան Մեծի փողոցում ձերբակալվեց ու Աշտարակի բաժին տեղափոխվեց Արմավիրի մարզի Այգեկ գյուղի բնակիչ, 42-ամյա մի տղամարդ: Նրա անձնական խուզարկությամբ հայտնաբերվեցին 60 գրամ քաշով, շագանակագույն զանգվածով պոլիէթիլենային փաթեթ, թղթե երեք փաթեթ, որոնցից երկուսը` սպիտակ փոշենման, մեկը` կանեփանման զանգվածով: Հայտնաբերվեցին նաև դիազեպամի՝ 12, բենզոնալի` երեք, ազալետինի՝ 1 և այլ 9 հաբեր:
42-ամյա տղամարդն էլ, հայտնաբերվածի հետ, ներկայացվել է քննչական վարչություն: Նա ձերբակալվել ու տեղափոխվել է ձերբակալվածների պահման վայր:
Երկու դեպքով էլ նախաքննությամբ հանգամանքները պարզվում են: