Այսօր Զվարթնոց գյուղի գազալցակայանում պայթյուն է տեղի ունեցել. այրվածքներով հիվանդանոց է տեղափոխվել 3 մարդ

Մայիսի 26-ին, ժամը 09.45-ին, ոստիկանության Վաղարշապատի բաժնում հաղորդում է ստացվել, որ ժամը 09.30-ի սահմաններում, Երևան-Էջմիածին ճանապարհին` Զվարթնոց գյուղի վարչական տարածքում գտնվող գազալցակայանի կոմպրեսորի սենյակում, գազի արտահոսքից առաջացել է հրդեհ և պայթյուն:
Ժամը 10.00-ին Վաղարշապատի հիվանդանոցից հաղորդում է ստացվել, որ տարբեր աստիճանի այրվածքներով բուժօգնության են տեղափոխվել 1986 թ. ծնված Արմեն Հ.-ն, 1965 թ. ծնված Արմեն Հ.-ն և 1994 թ. ծնված Արթուր Գ.-ն, ովքեր այնուհետև տեղափոխվել են Երևան քաղաքի այրվածքների կենտրոն:
Հրդեհի ընթացքում այրվել է նաև գազալցակայանի տարածքում կայանված «Վոլքսվագեն Տուարեգ» մակնիշի ավտոմեքենան:
Հրդեհը մարվել է ժամը 10.50-ի սահմաններում, մարտական մեկ հաշվարկի ուժերով:
Նյութական վնասի չափը պարզվում է:
Քննչական բաժնում նախապատրաստվում են նյութեր: