Շնորհավոր տոնդ, Հայաստան

Սեպտեմբերի 21-ը Հայաստանի Հանրապետության Անկախության օրն է: Այն մեզ համար պարզապես տոն չէ, այն մեր հավերժության վկայագիրն է:
Անկախությունը մեր ժողովրդի դարավոր երազանքն էր, որ հարատևելու է, իսկ Սեպտեմբերի 21-ը միշտ լինելու է բացառիկ ազգային տոն:
Անկախության հաստատման ու պետության կայացման գործում իր անուրանալի ներդրումն ունի նաև Հայաստանի Հանրապետության ոստիկանությունը:
Ոստիկանությունը միշտ է պետության հիմնասյուն ու պետականության կրող եղել: Արցախյան ազատամարտի տարիներին հենց ոստիկանության կանոնավոր ստորաբաժանումներն էին ուս ուսի կռվում աշխարհազորայինների հետ: Հենց ոստիկանությունն էր, մարտական հերթապահության հետ մեկտեղ, երկրի ներսը մաքրում հանցավոր զինված տարրերից' ապահովելով ռազմաճակատի թիկունքը եւ թիկունքում՝ ժողովրդի անվտանգությունը:
Պետականության և օրենքի երաշխավոր էր, երբ ոստիկանները զոհվում էին ռազմաճակատում և թիկունքում: Պետական մտածողության կրող էր, երբ ձեռնարկեց ու իրականացնում է համակարգի բարեփոխման գործընթացը:
Ոստիկանության առաքելությունը մեկն է՝ ծառայել պետությանն ու ժողովրդին: Վկան՝ հանուն այդ ծառայության զոհված հարյուրավոր ոստիկանները: Վկան՝ օրենքի գերակայության հաստատման, օրինականության ապահովման, քաղաքացու իրավունքների և անվտանգության պահպանման անուրանալի ջանքն ու ապագային միտված հաստատուն ընթացքը:
Իսկ Սեպտեմբերի 21-ը մեզ համար պարզապես տոն չէ. այն մեր հավերժության վկայագիրն է, որ Հայրենիքն ամեն օր հզորացնելու, սահմաններն անձեռնմխելի պահելու հրամայական ունի:
Շնորհավոր տոնդ, Հայաստան: