Ինտերպոլի գլխավոր ասամբլեայի 84-րդ նստաշրջանում (ՏԵՍԱՆՅՈՒԹ)

Նոյեմբերի 2-ից 5-ը Կիգալիում, Ռուանդա, անցկացվեց Քրեական ոստիկանության միջազգային կազմակերպության՝ Ինտերպոլի գլխավոր ասամբլեայի 84-րդ նստաշրջանը:
Վեհաժողովի աշխատանքներին մասնակցում էին Ինտերպոլի 145 անդամ երկրների ավելի քան 700 պատվիրակներ:
Գլխավոր ասամբլեան անցկացվեց «Ինտերպոլ-2020. Համաշխարհային սպառնալիքները դինամիկ միջավայրում» խորագրի ներքո:
Ինտերպոլի գլխավոր ասամբլայի 84-րդ նստաշրջանի աշխատանքներին մասնակցում էր նաեւ ՀՀ ոստիկանության պատվիրակությունը, ի դեմս՝ՀՀ ոստիկանության պետի տեղակալ, ոստիկանության գեներալ-մայոր Վարդան Եղիազարյանի եւ ՀՀ-ում Ինտերպոլի ԱԿԲ-ի պետ, ոստիկանության փոխգնդապետ Արա Ֆիդանյանի:
Նստաշրջանում քննարկվեցին միջազգային հանցավորության դեմ պայքարի մի շարք առաջնային խնդիրներ, այդ թվում՝ անձանց եւ թմրամիջոցների ապօրինի շրջանառության, կոռուպցիայի եւ ֆինանսական հանցագործությունների, ահաբեկչության եւ օտարերկրյա վարձկանների, կիբեռհանցավորության, շրջակա միջավայրի անվտանգության սպառնալիքների դեմ պայքարի եւ այլ հարցեր:
Ինտերպոլի գլխավոր քարտուղար Յուրգեն Շտոքն իր ելույթում նշեց, որ վերջին մեկ տարվա ընթացքում ավելացել են համաշխարհային մարտահրավերներն ու կոնֆլիկտային իրավիճակները, հանցավոր սպառնալիքները՝ ուղղված համաշխարհային անվտանգությանը: Նա կոչ արեց անդամ երկրներին ակտիվորեն համագործակցել հնարավոր բոլոր ուղիներով եւ մակարդակներով:
Վեհաժողովի շրջանակներում ՀՀ պատվիրակությունը հանդիպումներ ունեցավ Ինտերպոլի Գլխավոր քարտուղար Շտոքի, նախագահ տիկին Բալեստրազիի, մի շարք անդամ երկրների պատվիրակությունների հետ, քննարկվեցին ընդհանուր հետաքրքրություն ներկայացնող հարցեր:
ՀՀ պատվիրակությունը առանձին հանդիպում ունեցավ Իրանի Իսլամական Հանրապետության պատվիրակության հետ. քննարկվեցին ինչպես երկու երկրների ոստիկանությունների համագործակցության, այնպես էլ տարածաշրջանային կարեւորություն ունեցող եւ թիրախային հարցեր:
Վեհաժողովի ավարտին ընդունվեցին հանցավորության տարբեր ոլորտներում պայքարը կարգավորող հարցերին առնչվող մի շարք որոշումներ:

ՀՀ-ում Ինտերպոլի ԱԿԲ